الماتى وبلىسى جاستار ساياساتى باسقارماسى جانىنان الماتى وبلىسى ەرىكتىلەرىنىڭ «Birgemiz Jetisy» اتتى فرونت-كەڭسەسى اشىلدى، دەپ حابارلادى الماتى وبلىسى اكىمىنىڭ باسپا ءسوز قىزمەتى.
كەڭسەنىڭ رەسمي اشىلۋ راسىمىنە «قازاقستاننىڭ 100 جاڭا ەسىمى» جوباسىنىڭ جەڭىمپازى، ۆولەيبولدان قازاقستان جاستار قۇراماسىنىڭ كاپيتانى، جاس ۆولونتەر سەرىك ەسماتوۆ، وبلىستىڭ ۆولونتەر-دەمەۋشىلەرى، سونداي-اق قۇرمەتتى ازاماتتارى قاتىستى.
شارا اياسىندا وڭىردە ەرىكتىلەردىڭ جۇمىسىن دامىتۋعا باعىتتالعان ۇسىنىس-پىكىرلەردى جيناقتاۋ، ورتاعا سالۋ ماقساتىندا باسقوسۋ ءوتتى. ۇيىمداستىرۋشىلاردىڭ سوزىنشە، فرونت-كەڭسە وبلىس ۆولونتەرلارىنىڭ باسىن قوسىپ قانا قويماي، ىزگى ىستەر باستاۋ الاتىن ورىنعا اينالماق.
ايتا كەتەيىك، 12 اقپان كۇنى نۇر-سۇلتان قالاسىندا وتكەن رەسپۋبليكالىق ۆولونتەرلەر شتابىنىڭ اشىلۋىندا مەملەكەت باسشىسى قاسىم-جومارت توقايەۆ الماتى وبلىسىنا «تازا الەم» جانە «ءبىلىم» باعىتتارى بويىنشا بەلسەندى جۇمىس ىستەۋدى تاپسىرعان بولاتىن.
وسىعان قاراي، ءوڭىر ەرىكتىلەرى جۇمىستى باستاپ تا كەتتى. سونىمەن قاتار، شارا اياسىندا قايىرىمدىلىق اكسياسى ۇيىمداستىرىلىپ، تالدىقورعان قالاسىنداعى كوپبالالى جانە از قامتىلعان 20 وتباسىعا كومەك كورسەتىلدى. ونىڭ 14ء-ى جالعىزباستى جانە كوپبالالى انالار، سونداي-اق از قامتىلعان وتباسىلار. «Birgemiz» مارشرۋتى دەمەۋشىلەر مەن ەرىكتىلەر دايىنداعان ارنايى سىيلىقتاردى (ازىق-تۇلىك، كيىم-كەشەك، اقشالاي) وتباسىلاردىڭ ۇيلەرىنە بارىپ، تابىستادى.
پىكىر قالدىرۋ