الماتى اكىمدىگى قالانىڭ جابىلاتىنى تۋرالى مەسسەندجەرلەردە تارالعان اقپاراتتى جوققا شىعاردى.
"الەۋمەتتىك جەلىلەر مەن مەسسەندجەرلەردە اعىمداعى جىلدىڭ 30 ماۋسىمى ساعات 00:01-دەن باستاپ بەلگىلەنبەگەن مەرزىمگە دەيىن قوسىمشا شەكتەۋ شارالارىن ەنگىزۋ، ونىڭ ىشىندە ءىرى ساۋدا نىساندارىنىڭ جانە جاياۋ جۇرگىنشىلەر ايماقتارىنىڭ، ساياباقتاردىڭ، سكۆەرلەردىڭ، قالاعا كىرىپ-شىعاتىن جولداردىڭ جابىلاتىنى تۋرالى اقپاراتتىڭ تاراۋىنا بايلانىستى الماتى قالاسىنىڭ اكىمدىگى جانىنان قۇرىلعان كوروناۆيرۋستىڭ تارالۋىن بولدىرماۋ جونىندەگى كوميسسيا اتالعان اقپاراتتىڭ شىندىققا سايكەس كەلمەيتىنىن رەسمي تۇردە مالىمدەيدى" دەلىنگەن رەسمي سايت مالىمدەمەسىندە.
الماتىداعى كوروناۆيرۋستىڭ تارالۋىن بولدىرماۋ جونىندەگى كوميسسيا قالانىڭ رەسمي دەرەك كوزدەرىندە جاريالانعان اقپاراتتى عانا قولدانۋعا شاقىرادى.
سونىمەن قاتار، جالعان اقپارات تاراتقاندار جاۋاپكەرشىلىككە تارتىلادى دەپ اتاپ ايتتى.
اكىمدىك ءوز كەزەگىندە، قالا تۇرعىندارىنان مەگاپوليس اۋماعىنداعى ەپيدەميولوگيالىق رەجيمدى: الەۋمەتتىك قاشىقتىقتى، ماسكا رەجيمىن ۇستانىپ، ادامدار كوپ جينالاتىن ورىنداردان اۋلاق جۇرۋگە شاقىرادى.
مۇمكىندىگىنشە، ۇيدەن شىقپاۋ كەرەك، اسىرەسە، جاسى 65 جاستان اسقان ادامدارعا ساق بولعان ءجون.
پىكىر قالدىرۋ