جۇڭگو پارلامەنتى گونكونگ ءۇشىن ۇلتتىق قاۋىپسىزدىك تۋرالى زاڭ قابىلدادى. بۇل تۋرالى قامشى ءتىلشىسى BBC-گە سىلتەمە جاساپ حابارلايدى.

ۇلىبريتانيانىڭ بۇرىنعى كولونياسى بولعان گونكونگ بەيجىڭنىڭ باسقارۋىنا وتكەننەن 23 جىلدان كەيىن قالاعا تۇبەگەيلى وزگەرىستەر ەنگىزىلدى. BBC اقپاراتىنشا، زاڭ جوباسى گونكونگتە ءجيى وتكىزىلەتىن دەموكراتيالىق نارازىلىقتارعا جاۋاپ رەتىندە قابىلدانعان. ال قىتايلىق مەملەكەتتىك باق-تاردىڭ مالىمەتىنشە، زاڭ تەرروريزم، سەپاراتيزم جانە شەتەلدىك كۇشتەرمەن كەلىسىمدى بولدىرماۋعا باعىتتالعان.

شەتەلدىك ساراپشىلار زاڭناما جاھاندىق قارجى حابىنىڭ قۇقىقتارى مەن بوستاندىقتارىنا، سوت تاۋەلسىزدىگىنە، قالانىڭ ەرەكشە مارتەبەسىنە نۇقسان كەلتىرەدى دەپ الاڭدايدى.

گونكونگ 1997 جىلى ۇلىبريتانيانىڭ باقىلاۋىنان بەيجىڭنىڭ باسقارۋىنا وتكەن، ءبىراق ارنايى كەلىسىم بويىنشا گونكونگتىڭ باسقارۋ جۇيەسىنە 50 جىلعا كەپىلدىك بەرىلگەن.