قازاقستاندا كوروناۆيرۋس قاتىستى ستاتيستيكانى جاريالاپ وتىراتىن coronavirus2020.kz سايتى وتكەن تاۋلىكتە ەلدە 1604 ادامنان COVID-19 تابىلعانىن حابارلادى.
سايتتىڭ دەرەگىنشە، ۆيرۋس جۇقتىرعانداردىڭ ەڭ كوبى قاراعاندى وبلىسىندا تىركەلگەن. بۇل وڭىردە 191 ادامنان ۆيرۋس انىقتالسا، باتىس قازاقستاندا 149 ادام ىندەتكە شالدىققان. الماتى جانە نۇر-سۇلتان قالاسىندا دا 100-دەن اسا ادامعا ۆيرۋس جۇققان.
سوڭعى رەسمي اقپاراتقا سايكەس، ەلدە 41 055 ادامنان كوروناۆيرۋس تابىلعان. وسى ۋاقىتقا دەيىن ولاردىڭ 13558ء-ى جازىلدى، 188ء-ى كوز جۇمدى.
قازاقستان بيلىگى ەلدە كوروناۆيرۋسقا بايلانىستى 16 ناۋرىزدا باستالىپ 2 ايعا جۋىق سوزىلعان توتەنشە جاعداي رەجيمىن الىپ تاستاعان سوڭ ۆيرۋس جۇقتىرعاندار سانى كۇن سايىن كوبەيىپ جاتىر. ماۋسىم ايىنىڭ باسىنان بەرى ەلدە كۇنىنە 1000-نان استام ادامنان ۆيرۋس تابىلىپ ءجۇر.
دۇنيەجۇزىندە كوروناۆيرۋس جۇقتىرعاندار 10 ميلليوننان اسىپ كەتتى. ولاردىڭ 5،3 ميلليونى ىندەتتەن جازىلىپ شىقتى، جارتى ميلليونعا جۋىق ادام قايتىس بولدى.
پىكىر قالدىرۋ