جامبىل وبلىسىنىڭ اكىمى بەردىبەك ساپاربايەۆتىڭ توراعالىعىمەن وتكەن جامبىل وبلىسى جەدەل شتابىنىڭ كەزەكتى وتىرىسىندا تاياۋ ۋاقىتتا شەكتەۋ شارالارىن كۇشەيتۋ تۋرالى شەشىم قابىلداندى. شەكتەۋ شارالارىن كۇشەيتۋ تۋرالى شەشىم كوروناۆيرۋسپەن اۋىرعان ناۋقاستار سانىنىڭ وسۋىنە بايلانىستى بولىپ وتىر، دەپ جازادى coronavirus2020.kz.

باسقوسۋدا تاۋارلار مەن قىزمەتتەردىڭ ساپاسىن باقىلاۋ دەپارتامەنتىنىڭ باسشىسى بەرىك جارقىنبەكوۆ بايانداما جاسادى.

– وكىنىشكە وراي، ستاتيستيكا كوڭىل كونشىتپەيدى. ەگەر 15-21 ماۋسىم ارالىعىندا وڭىردە 317 جاعداي انىقتالسا، 22-28 ماۋسىم ارالىعىندا ول – 473ء-تى قۇراعان. ونىڭ 60 پايىزى تاراز قالاسىندا تىركەلگەن، – دەدى بەرىك جارقىنبەكوۆ. سونداي-اق، ونىڭ ايتۋىنشا، كورسەتكىشتىڭ ناشارلاۋىنا كارانتيندىك شارالاردى جەڭىلدەتۋ جانە ەپيدەمياعا قارسى شارالار الگوريتمدەرىنىڭ ساقتالماۋى اسەر ەتكەن.

دەپارتامەنت باسشىسى بارلىق ەڭبەك ۇجىمدارىنىڭ كىرەبەرىستەرىندە قىزمەتكەرلەردىڭ دەنە تەمپەراتۋراسىن ولشەۋدى، اۋرۋ بەلگىلەرى بار قىزمەتكەرلەردى جۇمىسقا جىبەرمەۋدى، سانيتاريالىق-ەپيدەميولوگيالىق تالاپتاردى ساقتاۋعا جاۋاپتى ادامدى ايقىنداۋدى، جۇمىس كۇنى ىشىندە قولعاپتار مەن ماسكالاردى پايدالانۋدى، ءبىر بولمەدە كەمىندە ءبىر مەتر قاشىقتىقتى ساقتاۋدى، قىزمەتكەرلەردى جۇمىسقا جانە جۇمىستان ۇيگە قىزمەتتىك اۆتوكولىكپەن ورتالىقتاندىرىلعان جەتكىزۋدى قامتاماسىز ەتۋدى ۇسىندى.

باسقوسۋ سوڭىندا بەردىبەك ساپاربايەۆ جامبىلدىقتاردى سانيتارلىق دارىگەرلەردىڭ ۇسىنىستارىن ۇستانۋعا شاقىرىپ، ۇندەۋ جولدادى.