تۇركىستان وبلىسى كەلەس اۋدانىنىڭ اباي اتىنداعى اۋرۋحانانىڭ حيرۋرگى الەۋمەتتىك جەلىدە قولدانۋعا جارامسىز مەديسينالىق قولعاپتاردى ءتۇسىرىپ سالعانى ءۇشىن جۇمىستان قۋىلدى.

33 جاستاعى قايرات سەيۋالييەۆ ۆيدەودا ناۋقاس پەن قىزمەتكەرلەردىڭ قاۋىپسىزدىگىن قامتاماسىز ەتەتىن زاتتاردىڭ بارلىعى كيەتىن كەزدە جىرتىلىپ قالا بەرەتىنىن ايتقان. دارىگەر بۇل ۆيدەونىڭ الدىندا اۋرۋحاناعا اكىمشىلىگىنە بارعانىمەن، سوندا دا ساپالى قولعاپ الا الماي، ناتيجە بولماعانىن ايتادى. كەيىننەن الەۋمەتتىك جەلىدە ۆيدەو قىزۋ تالقىلانىپ، حيرۋرگتىڭ جۇمىستان شىققانى بەلگىلى بولدى.

حيرۋرگ اۋرۋحاناعا 8 جىل بۇرىن "ديپلوممەن اۋىلعا" باعدارلاماسى ارقىلى جۇمىسقا تۇرعان. 7 جىل بويى حيرۋرگيا ءبولىمىنىڭ مەڭگەرۋشىسى بولىپ، قىزمەت اتقارىپ كەلگەن. الايدا 2020 جىلدىڭ اقپان ايىندا اۋرۋحاناعا جاڭا باسشىلىق كەلىپ، مامانداردىڭ ەش نەگىزسىز جۇمىستان بوساتىلۋى باستالعان.

– ساپاسى وتە تومەن قولعاپتاردى كورسەتكەنىم ءۇشىن اكىمشىلىك، باس دارىگەر، ونىڭ ورىنباسارلارى، كادر ءبولىمىنىڭ باسشىسى، زاڭگەر، اۋرۋحانا كاسىپوداعىنىڭ ءتوراعاسى سىندى 10 ادام مەنىڭ اتىما حاتتاما تولتىرعان. كەيىن 3 مينۋتتان سوڭ جۇمىستان قۋىلعانىم تۋرالى قاعاز كەلدى. مۇندا مەن اكىمشىلىكتەن جوق نارسەنى نە ماتەريالدىق كومەك سۇراعانىم جوق، تەك پاندەميا كەزىندە ءبىزدى قورعاي الاتىن قولعاپتار بەرۋىن سۇرادىم. ادىلدىك قايدا؟!، – دەدى قايرات سەيدۋالييەۆ. 

اۋرۋحانانىڭ باس دارىگەرى حيرۋرگتى جۇمىستان بوساتۋ ءۇشىن بىرنەشە سەبەپ بارىن ايتتى.

– اۋرۋحانادا قولعاپ مولشەر بويىنشا بەرىلەدى جانە ول مۇنى جاقسى بىلەدى. اعا مەدبيكەگە جۇگىنۋدىڭ ورنىنا ۆيدەو ءتۇسىرىپ، ونى جاريالادى. 30 ماۋسىمدا ول ەكىنشى ۆيدەونى جاريالادى. سونىمەن قاتار، قايرات سەيدۋالييەۆ اقپان ايىندا تارتىپتىك جازاعا تارتىلىپ،  سوگىس العان. 30 ناۋرىزدا ناۋقاسقا ءۇش ساعات ىشىندە ەشقانداي كومەك كورسەتپەگەنى ءۇشىن دە شاعىم ءتۇستى، – دەدى كەلەس اۋداندىق اۋرۋحانانىڭ باس دارىگەرى ايدا بەكسۇلتانوۆا.

حيرۋرگ كوميسسيا شەشىمىمەن كەلىسپەيتىنىن ايتىپ، وبلىستىق دەنساۋلىق ساقتاۋ باسقارماسى مەن اۋرۋحانا اكىمشىلىگى جۇمىستان زاڭسىز بوساتىپ، جالا جاپقانى ءۇشىن پرەزيدەنتكە حات جولداماق.