الماتى دارىگەرلەرى Covid-19 جۇقتىرعان 80 جاستاعى اقساقالعا كۇردەلى وتا جاساپ، ومىرىنە اراشا ءتۇستى، دەپ حابارلايدى قالا اكىمدىگىنىڭ باسپا ءسوز قىزمەتى.

قالالىق قوعامدىق دەنساۋلىق باسقارماسىنىڭ حابارلاۋىنشا، قاريا ارداگەرلەر ۇيىنەن قالالىق كارديولوگيالىق ورتالىقتىڭ جانساقتاۋ بولىمىنە جەتكىزىلدى.

«كەلگەندە ول كىسى باسى اينالىپ، ەسىنەن تانىپ، اۋا جەتپەي، كەۋدەسى اۋىرىپ تۇسكەن. ەلەكتروكارديوگرافياعا سايكەس دارىگەرلەر قالىپتى جاعدايدا مينۋتىنا 60-80 رەت سوعۋى ءتيىس جۇرەك مينۋتىنا 27 رەت قانا سوققانىن جانە قان تولىق جۇرمەي تۇرعانىن انىقتادى. ناۋقاس بىرنەشە جىل بويى جاساندى كارديوستيمۋلياتور، ەلەكتروكارديوستيمۋلياتورمەن ءومىر سۇرگەن ەكەن. ۋاقىت شەكتەۋلى بولعاندىقتان، ونىڭ ۇستىنە ميى زارداپ شەككەندىكتەن رەانيماسيا بولىمىندە شۇعىل تۇردە ۋاقىتشا ەندوكارديالدى ستيمۋلياسيا ورناتىلدى. سودان كەيىن جۇرەك سوعىسىنىڭ جيىلىگى قالپىنا ءتۇستى. كەلەسى كۇنى ينتەرۆەنسيوندى اريتمولوگتار وپەراسيا جاساپ، قۇرىلعىنى اۋىستىردى. ەگەر ۋاقىتىندا مەديسينالىق كومەك كورسەتىلمەگەندە، ناۋقاس قايتىس بولاتىن ەدى. قابىلدانعان ساتتە ناۋقاستا ەكى جاقتى پنيەۆمونيا بار ەكەنى انىقتالدى. پاسيەنت Covid-19 جۇقتىرعان. بۇل دياگنوز وپەراسيا بارىسىن قيىنداتقانى راس، ءبىراق ءبىزدىڭ ماماندار جاقسى ناتيجە كورسەتتى»، - دەيدى باس دارىگەر المات قوداسبايەۆ.

تەكسەرۋ كەزىندە ناۋقاستىڭ ەلەكتروستيمۋلياتورىنىڭ قۋاتى تاۋسىلعانى انىقتالعان.

وپەراسيادان كەيىن ناۋقاس جۇقپالى اۋرۋلار اۋرۋحاناسىنا كوروناۆيرۋس ينفەكسياسىن ەمدەۋگە جىبەرىلدى.