قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى جانازا راسىمدەرىن وتكىزۋگە قاتىستى ءبىرقاتار وزگەرىس جاساۋدى ءتۇسىندىردى.

– اباي قۇنانباي ۇلى سەمەيگە كەلگەن ءبىر ساپارىندا شاھاردا جۇقپالى ىندەتتىڭ تاراپ جاتقانى جايىندا جايسىز حابار ەستيدى.

ءبىرىنشى كەزەكتە، اباي حالىققا جانازا راسىمدەرىن وتكىزۋگە قاتىستى ءبىرقاتار وزگەرىس جاساۋدى ءتۇسىندىرۋ كەرەگىن ۇقتى. مىنە، وسى تۇستا ول ءوزى بىلەتىن سارموللا ەسىمدى مولدانى شاقىرىپ، وعان حالىق جۇقپالى اۋرۋدان ساقتانۋ ءۇشىن جانازا، حاتىم، استاردى از اداممەن وتكىزۋدى جۇرتقا ءتۇسىندىرۋ كەرەگىن جەتكىزەدى.

سارموللا: «قازا بولعان ادام ۇيىنە، جانازاعا حالىق از جينالسىن. ءمايىت شىققان ۇيگە كوپ ادام كەلمەسىن. ول ۇيدە اس ءىشۋ، حالىققا تاعام تاراتۋ، جەتىسىن، قىرقىن جاساۋ ۋاقىتشا توقتالسىن!» دەگەن ءسوزىن جەتكىزەدى. ءبىز تاريحتان ساباق العان، سوعان امال ەتكەن ەلمىز، – دەدى باس ءمۇفتي.

سونىمەن قاتار كارانتين تالاپتارىن قاتاڭ ساقتاپ، جيىن-تويلار مەن ساداقا استارعا مۇمكىندىگىنشە بارماۋعا شاقىردى.

– قازاق حالقى تورقالى توي مەن توپىراقتى ولىمدە توبە كورسەتۋدى ءوزىنىڭ مىندەتى سانايدى. تويدا تىلەك ايتۋ نەمەسە كىسى قايتقاندا وعان ءبىر ۋىس توپىراق سالۋ – سالتىمىزعا سىڭگەن عۇرىپتىڭ ءبىرى. الايدا ادامنىڭ عۇمىرى – اللانىڭ اماناتى. وعان ادال بولۋ – ادامدىق بورىش. نەمقۇرايلى قاراۋ – ءقاۋىپ پەن قاتەرگە اپارادى. سوندىقتان ەلدەگى بارشا جاماعاتتى وسى ءبىر قيىن كەزەڭدە بارىنشا ساقتانۋعا، جيىن-تويلار مەن ساداقا استارعا مۇمكىندىگىنشە بارماۋعا شاقىرامىن، – دەدى ناۋرىزباي قاجى تاعان ۇلى.