فيلولوگيا عىلىمىنىڭ دوكتورى، پروفەسسور، قازاقستاننىڭ ەڭبەك سىڭىرگەن عىلىم قايراتكەرى، قازاقستان ۇلتتىق عىلىم اكادەمياسىنىڭ اكادەميگى ءرابيعا سىزدىق 96 جاسقا قاراعان شاعىندا دۇنيەدەن ءوتتى. بۇل تۋرالى جۋرناليست مەيرامبەك تاۋبالدييەۆ حابارلادى.

ءرابيعا سىزدىق 1924 جىلى 17 تامىزدا اقتوبە وبلىسىنىڭ ويىل قالاشىعىندا دۇنيەگە كەلگەن.

1931-1938 جج. ورتا مەكتەپتە وقىدى.

1938-1940 جج. اقتوبە وبلىسىنىڭ تەمىر قالاسىنداعى پەدۋچيليششەدە وقىدى.

1940-1945 جج. اقتوبە وبلىسىنىڭ العا ستانساسىندا باستاۋىش كلاسس ءمۇعالىمى، تەمىر قالاسىندا ورتا مەكتەپتىڭ ءمۇعالىمى، تەمىر قالاسىنداعى پەدۋچيليششەنىڭ وقىتۋشىسى، اقتوبە قالاسىنداعى №6 ورتا مەكتەپتىڭ وقۋ ءىسى مەڭگەرۋشىسى.

1945 ج. "1941-1945 جج. ۇلى وتان سوعىسى كەزىندەگى ەڭبەكتەگى ەرلىگى ءۇشىن" مەدالىمەن ماراپاتتالدى.

1945-1947 جج. اباي اتىنداعى قازاق پەداگوگيكا ينستيتۋتىنىڭ ستۋدەنتى.

1947-1951 جج. قازپي-دە اسپيرانتۋرادا وقىدى.

1951-1957 جج. قازاقتىڭ وقۋ-پەداگوگتىك باسپاسىندا ("مەكتەپ"، "راۋان") رەداكتور جانە رەداكسيا مەڭگەرۋشىسى بولىپ قىزمەت ىستەدى.

1957-1961 جج. قازاق كسر عىلىم اكادەمياسى ءتىل جانە ادەبيەت ينستيتۋتىنىڭ كىشى عىلىمي قىزمەتكەرى (وسى جىلداردان باستاپ تابان اۋدارماي ءتىل ءبىلىمى ينستيتۋتىندا ءتۇرلى دارەجەدە قىزمەت اتقارىپ كەلەدى).

1959 ج. "اباي قارا سوزدەرىنىڭ نەگىزگى مورفولوگيالىق ەرەكشەلىكتەرى" دەگەن تاقىرىپتا كانديداتتىق ديسسەرتاسيا قورعادى.

1971 ج. "قۇرمەت بەلگىسى" وردەنىمەن ناگرادتالدى (21 شىلدە). - "اباي شىعارمالارىنىڭ ءتىلى" دەگەن تاقىرىپتا دوكتورلىق ديسسەرتاسيا قورعادى (25 مامىر).

1979 ج. قازاق سسر عىلىم اكادەمياسىنىڭ كوررەسپوندەنت مۇشەسى بولىپ سايلاندى (26 ءساۋىر).

1981 ج. قازاقستان كومپارتياسى ورتالىق كوميتەتىنىڭ، قازاق كسر جوعارعى كەڭەسى مەن مينيسترلەر كەڭەسىنىڭ 26 مامىرداعى قاۋلىسىمەن قازاق كسر-ىنىڭ قۇرمەتتى التىن كىتابىنا جازىلدى.

1984 ج. قازاق كسر-ىنىڭ ەڭبەك سىڭىرگەن عىلىم قايراتكەرى كۇرمەتتى اتاعى بەرىلدى (25 شىلدە).

1989 ج. تۇركى تىلدەرى ماماندىعى بويىنشا پروفەسسور اتاعى بەرىلدى (پروفەسسورلىق اتتەستات پر N017637، 8 جەلتوقسان)؛

1995 ج. "قازاق ادەبي ءتىلىنىڭ تاريحى" اتتى مونوگرافياسى ءۇشىن ق ر ۇعا-نىڭ شوقان ءۋاليحانوۆ اتىنداعى سىيلىقتىڭ لاۋرەاتى اتاعى بەرىلدى.

1996 ج. ابايدىڭ شىعارماشىلىق مۇراسىن زەرتتەۋ جونىندەگى جۇمىستار سيكلى ءۇشىن قازاقستان رەسپۋبليكاسىنىڭ مەملەكەتتىك سىيلىعىن الدى.

عالىمنىڭ نەگىزگى عىلىمي ەڭبەكتەرى قازاق ءتىلى تاريحى مەن گرامماتيكاسى، ءتىل مادەنيەتى ماسەلەلەرىنە ارنالعان. قازاق جازبا ادەبيەتىنىڭ نەگىزىن سالۋدا اباي قۇنانبايەۆ شىعارمالارىنىڭ زور ماڭىز اتقارعانىن دالەلدەدى. «قازاق ءتىلىنىڭ تۇسىندىرمە سوزدىگى»، «قازاق ءتىلىنىڭ ورفوگرافيالىق سوزدىگى»، «اباي ءتىلىنىڭ سوزدىگى»، تاعى باسقا ەڭبەكتەردى جازۋعا قاتىستى. 15-19 عاسىرلارداعى قازاق ادەبي ءتىلىنىڭ تاريحىن، ق.جالايىردىڭ «جامي-ات-تاۋاريح» اتتى شەجىرەسى ءتىلىن، قازاق ءتىل مادەنيەتىنىڭ ماسەلەلەرىن زەرتتەدى. ونىڭ «اباي شىعارمالارىنىڭ ءتىلى»، «اباي ولەڭدەرىنىڭ سينتاكسيستىك قۇرىلىسى»، «سوزدەر سويلەيدى»، «ءسوز سازى»، «قازاق ءتىلى ادىستەرىنىڭ نەگىزگى ماسەلەلەرى»، تاعى باسقا ەڭبەكتەرى جارىق كوردى.

ر.سىزدىقتىڭ 130-دان استام عىلىمي عىلىمي ەڭبەگى، ونىڭ ىشىندە 9 مونوگرافياسى، وقۋلىعى، وقۋ قۇرالى بار.

ەسىمى قازاقستان رەسپۋبليكاسىنىڭ التىن كىتابىنا ەنگىزىلگەن.