قازاقستان دەنساۋلىق ساقتاۋ مينيسترلىگىنىڭ 4 شىلدەدەگى دەرەگى بويىنشا، وتكەن تاۋلىكتە ەلدە 1644 ادامنان كوروناۆيرۋس تابىلعان.
ۆەدومستۆو جاريالاعان ستاتيستيكادا جۇقتىرعاندار سانى جونىنەن اتىراۋ وبلىسى كوش باسىندا تۇر. بۇل وڭىردە وتكەن تاۋلىكتە 377 ادامنان COVID-19 انىقتالعان. ولاردىڭ 325ء-ى سيمپتومسىز ناۋقاستار.
ايماقتار بويىنشا تولىق ستاتيستيكا تومەندەگىدەي:
(جالپى/سيمپتومسىز)
• نۇر-سۇلتان قالاسى - 71 / 34
•الماتى قالاسى - 114 / 52
• شىمكەنت قالاسى - 101 / 54
• اقمولا وبلىسى - 42 / 39
• اقتوبە وبلىسى - 41 / 32
• الماتى وبلىسى - 117 / 93
• اتىراۋ وبلىسى - 377 / 325
• شىعىس قازاقستان وبلىسى - 152 / 81
• جامبىل وبلىسى - 82 / 66
• باتىس قازاقستان وبلىسى - 110 / 35
• قاراعاندى وبلىسى - 76 / 48
• قوستاناي وبلىسى - 52 / 37
• قىزىلوردا وبلىسى - 37 / 23
• ماڭعىستاۋ وبلىسى - 114 / 105
• پاۆلودار وبلىسى - 68 / 15
• سولتۇستىك قازاقستان وبلىسى - 19 / 11
• تۇركىستان وبلىسى - 71 / 22
سوڭعى رەسمي اقپاراتقا سايكەس، ەلدە كوروناۆيرۋسقا شالدىققاندار سانى 45 719 ادامعا جەتىپ وتىر. وسى ۋاقىتقا دەيىن ولاردىڭ 15276-ى اۋرۋىنان جازىلىپ شىقتى. ال 188 ادام ىندەتتەن كوز جۇمدى. دەنساۋلىق ساقتاۋ مينيسترلىگى سوڭعى كۇندەرى ولگەن ادامدار تۋرالى اقپارات جاريالاپ جاتقان جوق. بۇعان دەيىن جاڭادان تاعايىندالعان دەنساۋلىق ساقتاۋ ءمينيسترى الەكسەي سوي كوز جۇمعاندار تۋرالى اپتاسىنا ءبىر-اق رەت مالىمەت بەرىلەتىنىن حابارلاعان.
قازاقستاندا كوروناۆيرۋس جۇقتىرعاندار العاش رەت ناۋرىز ايىنىڭ باسىندا انىقتالا باستادى. ارتىنشا ەلدە ەكى ايعا جۋىق توتەنشە جاعداي رەجيمى جاريالانىپ، قالالار كارانتينگە جابىلدى. مامىر ايىنىڭ ورتاسىندا بيلىك توتەنشە جاعداي رەجيمىن الىپ، كارانتين شەكتەۋلەرىن جەڭىلدەتە باستاعاندا ۆيرۋس جۇقتىرعاندار سانى كۇرت ءوستى. سوڭعى ايدا ەلدە كۇنىنە كەمى 1000 ادامنان ۆيرۋس انىقتالىپ ءجۇر.
قازاقستان بيلىگى ۆيرۋس جۇقتىرعاندار سانى 40 مىڭنان اسىپ، ەلدە جاپپاي تۇماۋ مەن پنيەۆمانيا ءورشي باستاعاندا قاتاڭ كارانتين رەجيمىن ەنگىزۋگە كىرىستى. قاتاڭ كارانتين رەجيمى 5 شىلدەدەن باستالماق.
ءقازىر ەلدەگى ءدارىحانالاردا ءدارى تاپشى. اۋرۋحانالارعا ناۋقاستار سىيماي جاتىر.
پىكىر قالدىرۋ