استانا كۇنىنە وراي شىعىس قازاقستاندا كوروناۆيرۋسپەن كۇرەسىپ، العاشقى شەپتە جۇرگەن دارىگەرلەرگە مەملەكەتتىك ناگرادالار بەرىلدى. ءقازىر دارىگەرلەر "باتىرعا" اينالدى دەسەك قاتەلەسپەسپىز. ولار كۇن-تۇن دەمەي جۇمىس ىستەپ، تۋعان-تۋىستارىن كورمەسە دە ناۋقاستاردى قۇتقارۋ ءۇشىن بارىن سالۋدا.
وڭىردەگى بارلىق كۇش COVID-19 تارالۋىنا جول بەرمەۋ جانە اتالمىش ۆيرۋسقا شالدىققانداردى ەمدەۋگە باعىتتالىپ وتىر. ستاسيونارلارداعى ينفەكسيالىق، پروۆيزورلىق جانە كارانتيندىك توسەك سانى 2 ەسەگە ارتتى. بارلىق اۋداندىق جانە قالالىق اۋرۋحانالاردا دياگنوستيكا جانە زەرتتەۋ جاسايتىن ينتەنسيۆتى تەراپيا پالاتالارى ءبىرىڭعاي الگوريتمدە دايىندالدى.
بۇگىندە بالانستا 50 رەنتگەن اپپاراتى، 196 وكپەنى جاساندى جەلدەتىن قۇرال، 15 كومپيۋتەرلىك توموگرافيا بار. بۇل نورماتيۆتەن 2 ەسە جوعارى. الداعى ۋاقىتتا وكپەنى جاساندى دەمالدىراتىن 50 اپپارات ساتىپ الۋ جوسپارلانىپ وتىر.
تامىز ايىندا زاماناۋي تالاپتارعا سايكەس جابدىقتالعان 100 جەدەل جاردەم كولىگى ساتىپ الىنادى.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ بۇيرىعىمەن دەنساۋلىق ساقتاۋ سالاسىندا ەڭبەك ەتىپ جۇرگەن ءبىزدىڭ وبلىستىڭ 15 دارىگەرىنە مەملەكەتتىك ناگرادالار تابىستالدى.
دۋمانبەك داۋىلبەكوۆ - سەمەي قالالىق ينفەكسيالىق اۋرۋحاناسىنىڭ باس سانيتار دارىگەرى. ول وبلىستا ينفەكسيا پايدا بولعان العاشقى كۇننەن باستاپ ناۋقاستاردى ەمدەپ، ارىپتەستەرىنە ۇيىمداستىرۋشىلىق-ادىستەمەلىك كومەك كورسەتتى. سەمەيدەگى ينفەكسيالىق اۋرۋحانادان 400-دەن استام پاسيەنت ەمدەلىپ شىقتى. بۇگىندە دۋمانبەك سەمەيدەگى 240 ورىندىق ءۇش ستاسيوناردىڭ جۇمىس بارىسىن قاداعالاپ وتىر.
دۋمانبەك داۋىلبەكوۆ «پاراسات» وردەنىنە لايىق دەپ تانىلىپ، ماراپاتتالدى.
فوميچيەۆا نينا الەكسەيەۆنا كوروناۆيرۋستان 200 ادام ەمدەلىپ شىققان وبلىستىق مەديسينالىق ورتالىقتاعى ينفەكسيالىق بولىمشەنىڭ مەڭگەرۋشىسى. 37 جىلدىق ەڭبەك تاجىريبەسى بار ينفەكسيونيست دارىگەر ءوڭىر تۇرعىندارىنا كەڭ اۋقىمدى كەڭەس بەرۋدە. نينا فوميچيەۆا «قۇرمەت» وردەنىمەن ماراپاتتالدى.
جۇنىسبايەۆا تولەۋعايشا ناۋكەباي قىزى ءۇرجارداعى اۋداندىق اۋرۋحانادا جوعارى ساناتتى مەيىربيكە بولىپ جۇمىس ىستەيدى. ەڭبەك ءوتىلى 36 جىلدان جوعارى. ول كەيبىر جاعدايدا ءبىلىمى مەن ىس-تاجىريبەسىنىڭ ارقاسىندا دارىگەردىڭ ورنىن الماستىرا الادى. تولەۋعايشا ناۋكەباي قىزى ءۇرجار اۋدانىنداعى پروۆيزورلىق ستاسيوناردى دايىنداۋعا بەلسەنە قاتىستى. وسى ءۇشىن تولەۋعايشا «ەرەن ەڭبەگى ءۇشىن» مەدالىنە لايىق دەپ تانىلدى.
ۆيسمەر تاتيانا ۆالەنتينوۆنا - شىعىس قازاقستان وبلىستىق قوعامدىق دەنساۋلىق ساقتاۋ دەپارتامەنتىنىڭ شەمونايحا اۋداندىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ سانيتارلىق-ەپيدەميولوگيالىق قاداعالاۋ ءبولىمىنىڭ جەتەكشى مامانى قىزمەتىن اتقارادى. ول قىزمەت بارىسىندا مەملەكەتتىك سانيتارلىق-ەپيدەميولوگيالىق باقىلاۋ جانە قاداعالاۋ شارالارىن جۇرگىزۋ جۇمىستارىن ۇيىمداستىرۋدى، سانيتارلىق-گيگيەنالىق جانە ىندەتكە قارسى الدىن الۋ شارالارىن جۇرگىزۋدى ناتيجەلى جانە ماقساتتى تۇردە قامتاماسىز ەتەدى.
تاتيانا ۆالەنتينوۆناعا «ەرەن ەڭبەگى ءۇشىن» مەدالى بەرىلدى.
كۋريزوۆا نينا ەۆگەنيەۆنا - شقو-داعى انا مەن بالا ورتالىعىنداعى بالالار ينفەكسيالىق بولىمشەسىنىڭ مەڭگەرۋشىسى. ول ءوڭىر تۇرعىندارىنا ينفەكسيالىق اۋرۋلاردان قالاي ساقتانۋ كەرەكتىگى جونىندە كەڭەس بەرۋدەن ەش جالىققان ەمەس.
نينا ەۆگەنيەۆنا ۇنەمى ماماندىعى بويىنشا بىلىكتىلىگىن جوعارىلاتىپ وتىرادى. باستى ماقسات - بالالاردى قورعاۋ.
ول قانشاما جىلدار بويعى اتقارعان قىزمەتى ءۇشىن «ەرەن ەڭبەگى ءۇشىن» مەدالىمەن ماراپاتتالدى.
مىرزاعارايەۆا گۇلميرا جىلقامان قىزى - شىعىس قازاقستان وبلىستىق قوعامدىق دەنساۋلىق ساقتاۋ دەپارتامەنتىنىڭ ريددەر قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ باسشىسى. ول كوپ جىلدىق تاجىريبەسىنىڭ ارقاسىندا ىندەتكە قارسى الدىن الۋ شارالارىن جۇرگىزۋدى ناتيجەلى جانە ماقساتتى تۇردە قامتاماسىز ەتەدى. گۇلميرا جىلقامانقىزىنا جىلدار بويعى سىڭىرگەن ەڭبەگى ءۇشىن قازاقستان رەسپۋبليكاسىنىڭ قۇرمەت گراموتاسى تابىستالدى.
مۋراتوۆا ولگا يۆانوۆنا - جەدەل جاردەم بريگاداسىنىڭ فەلدشەرى. ول BLS، ACLS، PALS، PHTLS سىندى حالىقارالىق ستاندارتتار بويىنشا ناۋقاستارعا كومەك كورسەتە الادى. ولگا يۆانوۆنا كوروناۆيرۋستىق ينفەكسيا (COVID-19) جۇقتىرعان جانك وعان شالدىعۋ مۇمكىن دەگەن ادامدارعا بارىپ، مەديسينالىق كومەك كورسەتۋدە بەلسەندىلىك تانىتتى. وسى ءۇشىن وعان «شاپاعات» مەدالى تابىستالدى.
جاقىپوۆا گۇلجان تولەگەن قىزى - سەمەي قالاسىنداعى جۇقپالى اۋرۋلار اۋرۋحاناسىنىڭ ينفەكسيونيست دارىگەرى. ول كوروناۆيرۋستىق ينفەكسياعا شالدىققان جانە ۆيرۋس جۇقتى دەگەن كۇدىكپەن جاتقان ادامدارعا كەڭەس بەرىپ، ەم جاساۋدا.
گۇلجان تولەگەن قىزى وسىنداي قيىن كەزەڭدە جان اياماي ەڭبەك ەتكەنى ءۇشىن «قۇرمەت» وردەنىمەن ماراپاتتالدى.
سابايەۆا اناستاسيا ميحايلوۆنا - وسكەمەندەگى № 4 قالالىق اۋرۋحانانىڭ مەيىرگەرى. ول كوروناۆيرۋستىق ينفەكسيا جۇقتىرعان ناۋقاستاردى ەمدەۋ ماقساتىندا پروۆيزورلىق بولىمشەدە تىنباي جۇمىس ىستەۋدە. اناستاسيا ميحايلوۆنانىڭ بۇل ەڭبەگى ەلەۋسىز قالمادى. ول قازاقستان رەسپۋبليكاسىنىڭ قۇرمەت گراموتاسىن يەلەندى.
فريك نادەجدا سەرگەيەۆنا - سەمەي قالالىق جەدەل مەديسينالىق كومەك كورسەتۋ ستانساسىنىڭ فەلدشەرى. ول تەوريالىق ءبىلىمىن تاجىريبەمەن ۇشتاستىرا بىلگەن تاپتىرماس مامان. نادەجدا سەرگەيەۆنا جاستارعا اقىل-كەڭەس بەرىپ، جول كورسەتۋدەن جالىققان ەمەس. ونىڭ جىلدار بويعى ەڭبەگى ەسكەرىلىپ، «شاپاعات» مەدالىنە لايىق دەپ تانىلدى.
نەچايەۆ يۆان گەورگييەۆيچ - شىعىس قازاقستان وبلىستىق مامانداندىرىلعان مەديسينالىق ورتالىعىنىڭ ەكىنشى دەڭگەيلى انەستەزيولوگ-رەانيماتولوگ دارىگەرى. ناۋقاستارعا كونسۋلتاتيۆتىك جانە تاجىريبەلىك كومەك كورسەتەدى.
ەڭبەكقور مامان رەتىندە كوزگە تۇسكەن يۆان گەورگييەۆيچ قازاقستان رەسپۋبليكاسىنىڭ قۇرمەت گراموتاسىنا يە بولدى.
فوميچيەۆا نينا الەكسەيەۆنا - شىعىس قازاقستان وبلىستىق مامانداندىرىلعان مەديسينالىق ورتالىعىنداعى ينفەكسيالىق بولىمشەنىڭ مەڭگەرۋشىسى. جوعارى بىلىكتى ينفەكسيونيست دارىگەر. وڭىردەگى بارلىق ارىپتەسىنە كەڭەس بەرىپ، تاجىريبەسىمەن بولىسەدى. وسكەمەندەگى COVID-19 شالدىققان جانە جۇقتىرۋى مۇمكىن دەگەن ادامداردى ەمدەپ، كەڭەس بەرەدى. ەل اماندىعى ءۇشىن كۇن-تۇن دەمەي ەڭبەك ەتىپ جۇرگەن نينا الەكسەيەۆنا «قۇرمەت» وردەنىمەن ماراپاتتالدى.
تۇرعانبايەۆا ايگۇل مالىك قىزى - شقو، تارباعاتاي اۋداندىق اۋرۋحاناسىنىڭ ينفەكسيونيست دارىگەرى. ول اۋدان تۇرعىندارىنا COVID-19 ساقتانۋ جولدارىن ءتۇسىندىرىپ، وعان شالدىققان ناۋقاستارعا كومەك كورسەتۋدە. اتالمىش پاندەميامەن كۇرەسۋ جولىندا ايانباي تەر توكەنى ءۇشىن ايگۇل مالىك قىزى «ەرەن ەڭبەگى ءۇشىن» مەدالىن يەلەندى.
مەديسينا قىزمەتكەرلەرىنە مەملەكەتتىك ناگرادالارىن تابىستاعان وبلىس اكىمىنىڭ ءبىرىنشى ورىنباسارى المازحان سماتلايەۆ قۇتتىقتاۋ سوزىندە ءار دارىگەردىڭ ەرلىگىن جەكە-جەكە اتاپ ءوتتى.
- سىزدەر تاۋلىك بويى ۇلت ساۋلىعى ءۇشىن ايانباي ەڭبەك ەتىپ جاتىرسىزدار. بۇل ناعىز ءپاتريوتيزمنىڭ كورىنىسى. سىزدەردىڭ بىلىكتىلىكتەرىڭىز بەن كاسىبيلىكتەرىڭىزگە العىس ايتامىز، - دەدى الماسحان سماتلايەۆ.
شقو اقپارات ورتالىعى
