قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى دارى-دارمەكتى قىمباتتاتقاندارعا قاتىستى پىكىر ءبىلدىردى. ءمۇفتيدىڭ ۆيدەوۇندەۋى قمدب Youtube كانالىندا جاريالاندى.

– اسىل دىنىمىزدە قاجەت ۋاقىتتا كەرەك كومەكتى جاساۋ ۇلكەن ساۋاپتى امالدىڭ بىرىنە جاتادى. سىندارلى ساتتە ناۋقاس جاندارعا قاجەتتى دارى-دارمەكتى جەتكىزىپ، العىسىن الايىق. ءدارى باعاسىن قولدان قىمباتتاتۋعا جول بەرمەي، جاقسىلىق جاساۋعا اسىعايىق. ال جۇرتىمىزدى جۇقپالى ىندەتتەن اراشالاپ الۋعا بار كۇشىن جۇمساپ، جان-تانىمەن قىزمەت ەتىپ جۇرگەن اق حالاتتى ابزال جاندارعا جىلى ءسوزىمىزدى ارناپ، جىگەرىن وياتايىق. ولار ءۇشىن ءاردايىم دۇعادا بولايىق، – دەدى قمدب ءتوراعاسى.

باس ءمۇفتي كوپتەگەن ازاماتتىڭ سىناق ساتىندە ساداقا بەرىپ، قۇربان شالىپ، دۇعا ەتىپ جاتقاندىعىن اتاپ ءوتتى.

– ساداقامىز بەن قۇرباندىعىمىز وسى ءبىر ناۋبەتتى كەزەڭنەن امان-ەسەن وتۋگە سەبەپكەر بولسىن. ءبىز تاعى دا جاماعاتپەن دۇعا جاساپ، يستيعفار، سالاۋات ايتۋعا نيەت ەتىپ وتىرمىز. حالىق دانالىعى: «كوپ تىلەگى كول بولار« دەيدى. بارشاڭىزدى كوپپەن بىرگە ەل يگىلىگى ءۇشىن دۇعا جاساپ، سالاۋات پەن يستيعفار ايتۋعا شاقىرامىن. حالقىمىز: «اۋىر جول – اتاندى سىنايدى، اۋىر ءىس – ادامدى سىنايدى» دەگەن. راسىندا بۇل سىناق جاس پەن جاسامىسقا وڭاي ءتيىپ جاتقان جوق. اللا تاعالا دەرتكە شالدىققاندارعا شيپا بەرىپ، ءدام-تۇزى تاۋسىلعان جانداردى مەيىرىمىنە العاي. ءامين!، – دەدى ناۋرىزباي قاجى تاعان ۇلى.

ايتا كەتەيىك، سوڭعى ۋاقىتتا ءدارىحانالاردا پاراسەتامول، اسپيرين، سيترامون سەكىلدى دەنە قىزۋىن تۇسىرۋگە ارنالعان دارىلەر تاپشى. تۇرعىنداردىڭ قاجەتتى پرەپاراتتارعا قول جەتكىزە الماي ءدارىحانالار الدىندا ۇزىن-سونار كەزەكتە تۇرعانى حابارلانعان بولاتىن.