قارجى ءمينيسترىنىڭ ءبىرىنشى ورىنباسارى بەرىك شولپانقۇلوۆ قازاقستاندا كوروناۆيرۋسپەن كۇرەسكە بولىنگەن قاراجاتتىڭ جالپى كولەمىن ايتتى.

– ەپيدەمياعا قارسى ءىس-شارالاردى جۇرگىزۋگە 125 ملرد تەڭگە كوزدەلگەن. بۇل قاراجات مەديسينا جانە باسقا قىزمەتكەرلەرگە قوسىمشا اقى تولەۋگە، 3 ينفەكسيالىق اۋرۋحانا قۇرىلىسىنا جانە باسقا شارالارعا جۇمسالدى. 575 ملرد تەڭگە قوسىمشا شىعىستار – ازاماتتار مەن ەكونوميكانى قولداۋعا جانە مەملەكەت باسشىسىنىڭ تاپسىرمالارىن ىسكە اسىرۋعا، نۇر-سۇلتان قالاسىنداعى ۇلەستىك قۇرىلىستىڭ پروبلەمالىق نىساندارىن اياقتاۋعا جانە باسقا دا باسىم مىندەتتەرگە باعىتتالعان، – دەدى بەرىك شولپانقۇلوۆ.

سونداي-اق ول كوروناۆيرۋس ىندەتىمەن كۇرەسكە ۇكىمەت رەزەرۆىنەن 66 ملرد 957 ملن تەڭگە، ونىڭ ىشىندە دەنساۋلىق ساقتاۋ مينيسترلىگىنە 46 ملرد 587 ملن تەڭگە بولىنگەنىن اتاپ ءوتتى.

ايتا كەتەيىك بۇعان دەيىن كوروناۆيرۋسپەن كۇرەسكە 6 ترلن تەڭگە بولىنگەن بولاتىن.

سوڭعى اقپارات بويىنشا، قازاقستاندا كوروناۆيرۋس ينفەكسياسىن جۇقتىرعاندار – 51 059، جازىلىپ شىققاندار – 16 928، قايتىس بولعاندار – 264.