مەملەكەت باسشىسى قاسىم-جومارت توقايەۆ رەسپۋبليكالىق تەلەارنالاردىڭ بىرىنەن قازاقستاندىقتارعا ۇندەۋ جاسادى. 

– كوروناۆيرۋستىڭ تارالۋىنا بايلانىستى دەنساۋلىق ساقتاۋ جۇيەسىنە كوپ اۋىرتپالىق ءتۇسىپ جاتىر. اشىعىن ايتۋ كەرەك، دەنساۋلىق ساقتاۋ جۇيەسى ىندەتكە تويتارىس بەرۋگە دايىن بولعان جوق. ءبىرقاتار ەلدە كارانتين ءتارتىبى قايتا كۇشەيتىلىپ، اۋە-كولىك قاتىناسى قايتادان شەكتەلدى. وكىنىشكە قاراي، ءبىزدىڭ ەلدەگى جاعداي دا وڭاي بولىپ تۇرعان جوق... جاعدايدىڭ تۇراقتالاتىنى ءسوزسىز. ونىڭ العاشقى بەلگىلەرى دە بار. سوندىقتان الداعى ەكى اپتا ءبىزدىڭ بولاشاق قادامدارىمىز ءۇشىن شەشۋشى كەزەڭ بولماق. بارلىق ازاماتتى تاعى دا كارانتين ەرەجەلەرىن ساقتاۋعا شاقىرامىن. ىندەتپەن كۇرەستىڭ ناتيجەلى بولۋى، ەڭ الدىمەن بارشا جۇرتتىڭ سانالى ارەكەتى مەن جاۋاپكەرشىلىگىنە بايلانىستى، – دەدى پرەزيدەنت.

ونىڭ ايتۋىنشا دارىگەرلەر بۇقارالىق اقپارات قۇرالدارى ارقىلى ازاماتتارعا ناقتى ءبىرىزدى مالىمەت بەرۋى كەرەك.

– دەرتتى ەمدەۋدىڭ ءتۇرلى جولدارىن كورسەتىپ ادامداردىڭ دەنساۋلىعىنا ءقاۋىپ توندىرۋگە بولمايدى. مۇنداي ارەكەتتەرگە توسقاۋىل قويۋ كەرەك. قىلمىستىق كودەكستىڭ 174 بابىنا سايكەس جالعان اقپارات تاراتقان ادام جاۋاپكەرشىلىككە تارتىلادى. قۇقىق قورعاۋ ورگاندارى ەل ىشىندەگى وسىنداي جونسىزدىكتەرگە قاتاڭ شارالار قولدانادى. سول سىندى دارىلەردىڭ باعاسىن بىرنەشە ەسەگە ءوسىرىپ، قالىپتاسقان جاعدايدا، ءوز ماقساتىندا پايدالانعىسى كەلگەن الىپساتارلاردى دا قۇقىق قورعاۋ ورگاندارى مەنىڭ تاپسىرماما سايكەس جاۋاپقا تارتىلا باستادى. ءقازىر مەملەكەتتىك ورگاندار ەلدى مەكەندەردى قاجەتتى دارى-دارمەكتەرمەن قامتاماسىز ەتۋدە، – دەدى توقايەۆ.

ايتا كەتەيىك، سوڭعى ۋاقىتتا ءدارىحانالاردا پاراسەتامول، اسپيرين، سيترامون سەكىلدى دەنە قىزۋىن تۇسىرۋگە ارنالعان دارىلەر تاپشى. تۇرعىندار قاجەتتى پرەپاراتتارعا قول جەتكىزە الماي ءدارىحانالار الدىندا ۇزىن-سونار كەزەكتە تۇرعانى حابارلانعان بولاتىن.