سولتۇستىك قازاقستان وبلىسىندا دارى-دارمەكتى كوتەرىڭكى باعامەن ساتۋ فاكتىسى انىقتالدى. بۇل تۋرالى قارجى مينيسترلىگىنىڭ قارجى مونيتورينگى كوميتەتى حابارلادى.
كوميتەتتىڭ حابارلاۋىنشا، سولتۇستىك قازاقستان وبلىسى بويىنشا ەكونوميكالىق تەرگەۋ دەپارتامەنتى قىزمەتكەرلەرى پوليسيامەن بىرلەسىپ، دارى-دارمەكتەردىڭ قىمبات باعادا جانە ولاردىڭ شىعۋ زاڭدىلىعىن راستايتىن قۇجاتتارسىز ساتىلعاندىعىن انىقتاعان.
كوميتەت حابارلاماسىندا ۆيرۋسقا قارسى قولدانىلاتىن 5640 تەڭگە تۇراتىن ينگاۆيرين ءدارىسى 6500 تەڭگەدەن، ال 1217 تەڭگە تۇراتىن ازيتروميسين انتيبيوتيگىنىڭ ءبىر قاپتاماسى 2500 تەڭگەدەن ساتىلعانى ايتىلعان.
ءقازىر وسى فاكتى بويىنشا تەرگەۋ ءجۇرىپ جاتىر.
قازاقستاندا كوروناۆيرۋس پەن پنيەۆمونيا ورشىگەن تۇستا ءدارىحانادان كەرەكتى دارى-دارمەگىن تاپپاي جۇرگەندەر كوبەيدى. ءقازىر ەلدىڭ ءىرى قالالارىنداعى ءدارىحانالاردا ءدارى تاپشى. 7 شىلدەدە ەلدىڭ دەنساۋلىق ساقتاۋ ءمينيسترى الەكسەي سوي جاقىن كۇندەرى بارلىق ءدارىحانالارعا ءدارى جەتكىزىلەتىنىن مالىمدەگەن. ءبىراق ەلدە ءدارى تاپشىلىعى ءالى جويىلماي تۇر.
پىكىر قالدىرۋ