الماتى وبلىسىندا ەرتەڭ، 11 شىلدەدەن باستاپ ەكى كۇنگە قاتاڭ كارانتين شارالارى ەنگىزىلەدى. بۇل تۋرالى وبلىس اكىمىنىڭ باسپا ءسوز حاتشىسى عالىمۇرات جۇكەل ءوزىنىڭ facebook پاراقشاسىندا حابارلادى.

– 11 شىلدەدەن باستاپ وبلىس اۋماعىندا بارلىق ءوندىرىس، ساۋدا، دەمالىس ورىندارى جابىلادى. تالدىقورعاندىقتار ءجيى باراتىن كوممۋنالدىق بازار جۇمىسى دا توقتاتىلادى. قوعامدىق كولىك جۇرمەيدى. تەك ءۇي ماڭىنداعى ازىق-تۇلىك دۇكەندەرى عانا ىستەيدى. مۇنداعى ماقسات – كوروناۆيرۋستىق جانە پنيەۆمونيالىق ينفەكسيانىڭ تارالۋ تىزبەگىن توقتاتۋ. قالا تۇرعىندارى مەن قالا قوناقتارىنان ەكى كۇن ەشقايدا شىقپاۋىن سۇرايمىز. ەكى كۇندىك كارانتين شارالارىن بۇزعان، سەبەپسىز ۇيىنەن شىققاندارعا ايىپپۇل سالىنادى، –  دەدى عالىمۇرات جۇكەل.

رەسمي دەرەك بويىنشا،  الماتى وبلىسىندا 2939 ادامنان كوروناۆيرۋس انىقتالعان. وسى ۋاقىت دەيىن ولاردىڭ 1562ء-ى اۋرۋدان ايىعىپ، تورتەۋى قايتىس بولعان.

وبلىستا سونداي-اق پنيەۆمونيانىڭ تارالۋى دا ءورشىپ تۇر. بۇل دەرتكە شالدىققاندار تۋرالى ناقتى اقپارات جوق. ءبىراق بۇگىن وبلىس اكىمىنىڭ ورىنباسارى سەرىكجان بەسكەمپىروۆ جانە وبلىستىڭ باس سانيتار دارىگەرى قايرات بايمۇحامبەت پنيەۆمونيادان قايتىس بولدى.

بۇدان بولەك، وبلىس اكىمى اماندىق باتالوۆ ەنتىگۋ مەن جۇرەك قان تامىرلارىنىڭ جەتكىلىكسىزدىگى دياگنوزى بويىنشا نۇر-سۇلتانداعى كارديولوگيا ورتالىعىندا ەمدەلىپ جاتىر.