باتىستىڭ جەتەكشى ءىرى باسىلىمدارى "قازاقستاندا ءولىم مولشەرى COVID-19-دان دا جوعارى بەلگىسىز ۆيرۋس پايدا بولدى" دەپ جارىسا جازدى.

الەمدىك ءىرى بۇقارالىق اقپارات قۇرالدارى CNN، The Mirror، Daily Express، Business Insider، ITV، The Sun گازەتى جانە نەمىستىڭ جەتەكشى DW سەكىلدى اقپارات رەسۋرستارى "قازاقستاندا كوروناۆيرۋسقا قاراعاندا ءقاۋىپتى ءارى بەلگىسىز پنيەۆمونيا كەڭىنەن تارالىپ جاتىر" دەگەن مازمۇندا اقپارات جاريالادى.

بۇل دەرەكتەر قازاقستاننىڭ دەنساۋلىق ساقتاۋ ءمينيسترى الەكسەي سويدىڭ "2020 جىلدىڭ العاشقى جارتى جىلدىعىندا پنيەۆمونيادان 1172 ادام قايتىس بولدى" دەگەن مالىمدەمەسىنەن كەيىن پايدا بولدى.  الەكسەي سوي كەلتىرگەن دەرەككە سايكەس، پنيەۆمونيادان قايتىس بولعاندار كوروناۆيرۋس ولىمىنەن بەس ەسەگە كوپ، سەبەبى رەسمي ستاتيستيكا بويىنشا قازىرگە دەيىن قازاقستاندا COVID-19-دان كوز جۇمعاندار سانى 264.

ءبىر قىزىعى، 3 شىلدە كۇنى ق ر باس سانيتار دارىگەرى ايجان ەسماعامبەتوۆا 2020 جىلدىڭ العاشقى التى ايىندا 1772 ادامنىڭ، ماۋسىمدا 628 ادامنىڭ پنيەۆمونيادان قايتىس بولعانىن ايتقان. بۇل ەسەپ بويىنشا، پنيەۆمونيادان كوز جۇمعاندار COVID-19-دان قازا تاپقانداردان 7 ەسە كوپ.

وسىلايشا، الەكسەي سوي مەن ايجان ەسماعامبەتوۆا بەرگەن ستاتيستيكالار ءارتۇرلى.

وسىدان كەيىن العاش بولىپ جۇڭگو ەلشىلىگى "وسى جىلدىڭ ءبىرىنشى جارتىجىلدىعىندا قازاقستاندا 1772 ادام پنيەۆمونيادان اجال قۇشتى، تەك ماۋسىم ايىندا عانا 628 ادام ءولدى، ونىڭ ىشىندە جۇڭگو ازاماتتارى دا بار" دەپ جۇڭگو ازاماتتارىنا دابىل قاققان. 

بريتانيالىق The Mirror باسىلىمى " كورونناۆيرۋستان دا ءقاۋىپتى، ولىمگە اكەلەتىن بەلگىسىز پنيەۆمونيا قازاقستاندا  تەز تارالىپ جاتىر" دەپ مالىمدەسە، CNN تەلەارناسى "قازاقستان دەنساۋلىق ساقتاۋ مينيسترلىگى جانە باسقا اگەنتتىكتەر سالىستىرمالى زەرتتەۋ جۇرگىزىپ جاتىر جانە پنيەۆمونيا ۆيرۋسىنىڭ سەبەبى بەلگىسىز" دەپ حابارلاعان.

Business Insider، The Sun، ITV جانە گەرمانيالىق جەتەكشى ب ا ق DW " قازاقستاندا COVID-19 ءولىم مولشەرىنەن اناعۇرلىم جوعارى اۋرۋ تاراپ جاتىر" دەگەن تاقىرىپپەن ماقالا جاريالاعان. The Express باسىلىمى "قازاقستاندا  بەلگىسىز پنيەۆمونيانىڭ 32 000 وقيعاسىنان كەيىن جۇڭگو دابىل قاعۋدا. ورتالىق ازيا ەلىندە ءولىم-جىتىم دەڭگەيى كوروناۆيرۋستان الدەقايدا جوعارى بەلگىسىز پنيەۆمونيا پايدا بولدى" دەپ اقپارات تاراتقان.

ال، ۇلىبريتانيالىق Daily Mail باسىلىمى " قازاقستاندا بەلگىسىز ۆيرۋس پايدا بولدى، مىڭداعان ادامدار اۋىرىپ، قايتىس بولىپ جاتىر" دەگەن مازمۇنداعى تاقىرىپپەن جاڭالىق جاريالاعاننان كەيىن، كوپ وتپەي ول تاقىرىپتى وزگەرتىپ " جۇڭگو دەنساۋلىق ساقتاۋ ماماندارى قازاقستاندا تارالىپ جاتقان بەلگىسىز پنيەۆمونيانى شىن مانىندە COVID-19 دەپ سانايدى" دەپ اقپارات تاراتقان.

– بۇگىن كەشتە بەيجىڭدەگى قىتايدىڭ باس ەپيدەميولوگى ۋ سزيۋنيۋ قازاقستاندا تارالعان «بەلگىسىز پنيەۆمونيا» ەپيدەميولوگيالىق تۇرعىدان COVID-19 دەپ سانايتىنىن جەتكىزدى،– دەپ مالىمدەگەن لوندوندا شىعاتىن باسىلىم.

باس ەپيدەميولوگ قازاقستان تۋرالى جاڭالىقتاردى بايقاعانىن جانە ينتەرنەتتەگى ءتيىستى اقپاراتتاردى وقىعانىن ايتقان.

ول سونىمەن بىرگە قازاقستانداعى «بەلگىسىز پنيەۆمونيادان» بولعان ءولىم-جىتىم دەڭگەيى COVID-19-عا ۇقساس ەكەنىن جەتكىزگەن.

ال، ۇلىبريتانيالىق مامان دا قازاقستانداعى جاعدايلاردىڭ انىقتالماعان COVID-19 ينفەكسياسى دەپ سەنەتىنىن جاريالاعان. ۋورۆيك ۋنيۆەرسيتەتىنىڭ ۆيرۋسولوگى جانە ونكولوگى پروفەسسور لوۋرەنس يانگ MailOnline-عا سۇحبات بەرىپ، " بەلگىسزى پنيەۆمونيانىڭ" COVID-19-عا قاتىسى جوقتىعىنا سەنۋ قيىن ەكەنىن مالىمدەگەن.

قازاقستاندىق نەيروحيرۋرگ دارىگەر مىڭجىلقى بەردىقوجايەۆ "پنيەۆمونيادان قايتىس بولىپ جاتقان ادامداردىڭ 99 پايىزىنىڭ ولىمىنە كوروناۆيرۋس سەبەپ" دەپ سانايدى.

قازاقستان قوعامىندا بيلىك كوروناۆيرۋس ستاتيستيكاسىن ازايتىپ، ولاردى پنيەۆمونيا دەپ كورسەتىپ جاتىر دەگەن پىكىر بار. وعان قوسا، رەسمي ستاتيستيكا بويىنشا، پنيەۆمونيادان قايتىس بولعانداردىڭ سانى COVID-19-دان كوز جۇمعانداردان بەس ەسە، ءتىپتى، جەتى ەسەگە دەيىن كوپ بولۋى، ارينە، الەمنىڭ نازارىن قازاقستانعا اۋدارادى. ءتىپتى، كەيبىر ەلدەردە "قازاقستاننان ابايلاڭدار، ول مەملەكەتتە كوروناۆيرۋستان دا ءقاۋىپتى جاڭا ۆيرۋس پايدا بولدى" دەگەن ەسكەرتۋلەر باستالىپ كەتكەن.