بۇگىن، 10 شىلدەدە ۇكىمەتتىڭ كەڭەيتىلگەن وتىرىسىنا قاتىسقان قازاقستان پرەزيدەنتى قاسىم-جومارت توقايەۆ قوعام الدىندا ۇپاي جيناۋدى كوزدەمەيتىنىن ايتتى. 

پرەزيدەنتتىڭ سوزىنشە، وسى وتىرىس الدىندا وزىنە ۇكىمەتتى تۇگەل وتستاۆكاعا جىبەرۋ تۋرالى كەڭەس بەرىلگەن، ءبىراق ول "ۇپاي جيناپ الۋدى كوزدەمەيتىنىن" ايتىپ، ۇسىنىستان باس تارتقان. 

– ماعان كەيبىر ايماقتاعى جانە ۆەدومستۆولارداعى ءبىرىنشى باسشىلاردى جۇمىستان بوساتۋ، ءتىپتى ۇكىمەتتى تۇگەل وتستاۆكاعا جىبەرۋ تۋرالى كەڭەس بەرىلگەن. "قوعام بۇل ارەكەتىڭىزدى دۇرىس قابىلدايدى، ۇپاي جيناپ الاسىز" دەگەن وي ايتىلدى. الايدا ماعان ءقازىر ۇپاي كەرەك جوق. مەن جاۋاپتى ادامداردى تىڭداۋعا دايىنمىن. ءبىراق حالىق الدىندا ويىن ۇيىمداستىرۋدى ءجون دەپ ەسەپتەمەيمىن. ءقازىر ونداي جاستا دا، جاعدايدا دا ەمەسپىن، – دەدى توقايەۆ. 

پرەزيدەنت بۇگىنگى وتكەن وتىرىس باراسىندا كوروناۆيرۋس ينفەكسياسىنا بايلانىستى ەكى اپتاعا ەنگىزىلگەن كارانتين ەلدە جاعدايدى تۇزەمەسە، ۇكىمەتتىڭ قازىرگى قۇرامىنا بايلانىستى ماسەلە تۋىندايتىنىن دا ايتقان ەدى. 

قازاقستاندا ءقازىر كوروناۆيرۋس پەن پنيەۆمونيا ءورشىپ تۇر. اۋرۋحانالاردا ورىن جەتىسپەيدى، ءدارىحانالاردا ءدارى تاپشى. سوڭعى اقپاراتقا ساي، ەلدە ناۋرىزدا باستالعان كوروناۆيرۋستى 55 مىڭعا جۋىق ادام جۇقتىرعان. بيلىك 5 شىلدەدەن باستاپ ەكى اپتاعا كارانتين ەنگىزدى. ءبىراق ەلدە ۆيرۋس جۇقتىرعاندار سانى كۇن سايىن ءوسىپ جاتىر. قازاقستان ۆيرۋس جۇقتىرعاندار سانى جونىنەن الەمدە 31-ورىندا.