قازاقستان رەسپۋبليكاسىنىڭ پرەزيدەنتى قاسىم-جومارت 13 شىلدەنى ۇلتتىق ازا تۇتۋ كۇنى دەپ بەلگىلەدى. 10 شىلدە ۇكىمەتتىڭ كەڭەيتىلگەن وتىرىسىنا قاتىسقان پرەزيدەنت پاندەميامەن كۇرەستە ناتيجە كورسەتە الماعان ۇكىمەتتىڭ جۇمىسىن سىنعا الدى. وسى تۋرالى قازاقستان جازۋشىلار وداعىنىڭ مۇشەسى، جۋرناليست بازاربەك تۇكتىباي مەن ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ مەڭگەرۋشىسى ينديرا رىستينا پىكىر ءبىلدىردى.

پرەزيدەنت پاندەمياعا قارسى كۇرەس بارىسىندا بارشا قازاقستاندىقتاردى مازالاعان پروبلەمالار تۋرالى ايتىپ بەردى. ساقتىق شارالارىن ساقتاساق، قاتەرلى ىندەتتىڭ بەتى بەرى قارار ما ەدى؟! الداعى ەكى اپتا ءبىزدىڭ بولاشاق قادامدارىمىز ءۇشىن شەشۋشى كەزەڭ. وزدەرىڭىز كورىپ-بىلىپ وتىرعانداي ءقازىر الەۋمەتتىك جەلى قازاناماعا تولىپ كەتتى. ارتى قايىرلى بولعاي، ولگەنگە – يمان، تىرىگە – سالاۋات. ەندەشە، بارلىق ازاماتتار بوساڭسۋعا جول بەرمەي، ەل بولىپ كارانتين ەرەجەلەرىن قاتاڭ ساقتايىق، - دەدى ول.

«اشىعىن ايتۋ كەرەك، دەنساۋلىق ساقتاۋ جۇيەسى ىندەتكە تويتارىس بەرۋگە دايىن بولعان جوق. وسى ماسەلە بويىنشا ءبىز تەرگەۋ جۇرگىزەمىز جانە بۇل جاعدايدان ساباق الامىز. اكىمدەردىڭ جىبەرگەن قاتەلىكتەرىنە ءتيىستى باعا بەرەمىز» - دەگەن پرەزيدەنت ءسوزىن كەلتىرگەن ساراپشى وسى شەشىمدى قولدايتىنىن ءبىلدىردى.

دەنساۋلىق ساقتاۋ سالاسىندا جۇرگەن قىزمەتكەرلەر كۇندىز-تۇنى وسى قاتەرلى ىندەتكە شالدىققاندارمەن كۇرەسىپ، ۇلت دەنساۋلىعىن ساقتاۋمەن اينالىسىپ جاتىر. وكىنىشكە قاراي، ارا-اراسىندا تۋرالاپ كەلگەن اجال الماي تىنباۋدا. مەملەكەت باسشىسى تاعى ءبىر ماڭىزدى ماسەلەگە توقتالدى. ول دارىگەرلەرىمىز بۇقارالىق اقپارات قۇرالدارى ارقىلى ازاماتتارعا ناقتى، ءبىرىزدى مالىمەت بەرۋى كەرەكتىگى جانە دەرتتى ەمدەۋدىڭ نەشە ءتۇرلى جولدارىن كورسەتىپ، ادامداردىڭ دەنساۋلىعىنا ءقاۋىپ توندىرمەۋ. بۇل شەشىمدى دە قولدايمىن. پرەزيدەنتتىڭ ايتۋىنشا، ءقازىر مەملەكەتتىك ورگاندار ەلدى مەكەندەردى قاجەتتى ءدارى دارمەكپەن تولىق قامتاماسىز ەتۋدە. وسىعان وراي، ءتيىستى قور دا جاساقتالعان. دەمەك، اسا الاڭداۋعا نەگىز جوق، ءبىراق «ساقتانساڭ – ساقتايدى» دەگەندى ەستەن شىعارماي، ءاردايىم سانالى ارەكەت پەن جاۋاپكەرشىلىككە دەن قويۋ كەرەك-اق، - دەدى ب.تۇكتىبايەۆ. 

ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ مەڭگەرۋشىسى ي.رىستينا دا پرەزيدەنت قابىلداعان شەشىمدەر جايلى پىكىر ءبىلدىردى.

ومىردە ەڭ قورقىنىشتى ساتتەر بۇل اقپاراتتىڭ جوقتىعى. اقپاراتسىزدىق تۇسىنىكسىزدىكتىڭ پايدا بولۋىنا اكەلىپ سوعادى، ال تۇسىنىكسىزدىك ءوز كەزەگىندە ماسەلەنىڭ تۇپكى سەبەپتەرىن بىلمەيتىن اقىل-ويدىڭ شاتاسقان جاعدايلارىنا اكەلەدى. ءبىزدىڭ قوعامدا ءقازىر اقپارات كوپ، حالىق قايسىسىنا سەنەرىن بىلمەي دال بولۋدا. سوندىقتان دا حالىققا دۇرىس اقپارات اۋاداي قاجەت. اسىرەسە وسىنداي اۋىر كەزەڭدە، - دەدى ول.

ي.رىستينانىڭ ايتۋىنشا، ىندەتپەن كۇرەسۋ ماقساتىندا مەملەكەتتىك ساياساتتى ازىرلەۋدىڭ دە ترانسفورماسياعا ۇشىراۋى بايقالادى، ۇكىمەت قاتىپ قالعان جانسىز مەحانيزم ەمەس، كەرىسىنشە ەلدەگى بولىپ جاتقان وقيعالارعا بەيىمدەلدى:

مەملەكەتتىك ساتىپ الۋدىڭ ارنايى ءراسىمى ەپيدەمياعا قارسى قاجەتتىلىكتەردى ءبىر كوزدەن الۋ ادىسىمەن كەڭەيتىلدى؛

قازاقستان رەسپۋبليكاسىندا تىركەلمەگەن ۆيرۋسقا قارسى پرەپاراتتاردى ءبىرىڭعاي اكەلۋدىڭ جەڭىلدەتىلگەن ءتارتىبى. مۇنداي وتىنىشتەر كۇن ىشىندە قارالاتىن بولادى؛

كۆي-دى ەمدەۋگە ارنالعان وتاندىق وندىرۋشىلەردىڭ جاڭا پرەپاراتتاردى تىركەۋ ءراسىمى جەدەلدەتىلدى.

ەلدە ءقازىر تۋىنداپ جاتقان بارلىق ماسەلە مەملەكەت باسشىسىنىڭ نازارىندا ەكەنىن ۇعىندىق. كوروناۆيرۋسپەن كۇرەس كۇشەيىپ كەلەدى، ءبارى پرەزيدەنتتىڭ باقىلاۋىندا. سوندىقتان جاعداي وڭالار دەپ ۇمىتتەنەيىك. 13 شىلدە ازا تۇتۋ كۇنى حالىق بىرلىگىنىڭ ەسەلەنۋىنە اكەلەدى دەپ سەنەمىن، - دەدى ساياساتتانۋشى.