دۇنيەجۇزىلىك دەنساۋلىق ساقتاۋ ۇيىمى (ددسۇ) جۇما كۇنى قازاقستانداعى بەلگىسىز وكپە اۋرۋىن COVID-19 دەپ سانايتىنىن مالىمدەدى. بۇل تۋرالى قامشى ءتىلشىسى BBC-گە سىلتەمە جاساپ حابارلايدى.

ددسۇ توتەنشە جاعداي باعدارلاماسىنىڭ جەتەكشىسى مايك راياننىڭ سوزىنشە،  قازاقستانداعى COVID-19 قوزعالىسىنىڭ جوعارى تراەكتورياسى بەلگىسىز پنيەۆمونيانىڭ شىن مانىندە COVID-19-دىڭ انىقتالماعان جاعدايلارى ەكەنىن بىلدىرەدى.

بۇعان دەيىن جۇڭگو ەلشىلىگى ەلدە تاراعان بەلگىسىز پنيەۆمونيانى "قازاقستان ۆيرۋسى" دەپ اتاپ، "قازاقستاندا كوروناۆيرۋستان دا ءقاۋىپتى ۆيرۋس تارالدى" دەپ مالىمدەگەن. ەلشىلىكتىڭ مالىمدەمەسىنەن كەيىن كەيبىر قىتايلىق ساراپشىلار پنيەۆمونيانىڭ قىتايعا تارالۋىن بولدىرماۋ ءۇشىن شارالار قابىلداۋ كەرەك ەكەنىن ايتىپ، قازاقستان مەن قىتايدىڭ سولتۇستىك-باتىسىنداعى شىڭجاڭنىڭ شەكتەسەتىنىن ەسكەرتكەن. كوپ وتپەي، باتىس باق-تارى "ورتالىق ازيا ەلىندە ءولىم كورسەتكىشى كوروناۆيرۋستان جوعارى جاڭا ۆيرۋس پايدا بولدى" دەگەن مازمۇنداعى اقپاراتتاردى جارىسا جاريالاعان. 

وعان سەبەپ، قازاقستاننىڭ دەنساۋلىق ساقتاۋ ءمينيسترى الەكسەي سويدىڭ "2020 جىلى پنيەۆمونيادان 1172 ادام قايتىس بولدى" دەگەن مالىمدەمەسى. الەكسەي سوي كەلتىرگەن دەرەككە ساي، پنيەۆمونيادان قايتىس بولعاندار كوروناۆيرۋس ولىمىنەن بەس ەسەگە كوپ، سەبەبى رەسمي ستاتيستيكا بويىنشا قازىرگە دەيىن قازاقستاندا COVID-19-دان كوز جۇمعاندار سانى 264.

ال 3 شىلدە كۇنى ق ر باس سانيتار دارىگەرى ايجان ەسماعامبەتوۆا 2020 جىلدىڭ العاشقى التى ايىندا 1772 ادامنىڭ، ماۋسىمدا 628 ادامنىڭ پنيەۆمونيادان قايتىس بولعانىن ايتقان. بۇل ەسەپ بويىنشا، پنيەۆمونيادان كوز جۇمعاندار COVID-19-دان قازا تاپقانداردان 7 ەسە كوپ.

وسى دەرەكتەرگە بايلانىستى شەتەلدىڭ ءىرى باق-تارى "قازاقستاندا ءولىم مولشەرى كوروناۆيرۋستان دا جوعارى، ءقاۋىپتى ۆيرۋس تاراپ جاتىر" دەگەن اقپاراتتى جارىسا تاراتتى. ءتىپتى، كەيبىر ەلدەر ازاماتتارىنا قازاقستاننان ابايلاۋ تۋرالى ەسكەرتۋلەر جاساعان.

الايدا ارتىنشا لوندوندا شىعاتىن Daily Mail باسىلىمى بريتانيالىق جانە قىتايلىق ەپيدەميولوگتاردان سۇحبات الىپ، عالىمداردىڭ قازاقستاندا تارالعان پنيەۆمونيا شىن مانىندە COVID-19 دەپ سانايتىنىن جاريالاعان.

بەيجىڭدەگى قىتايدىڭ باس ەپيدەميولوگى جانە ۇلىبريتانيا ۋورۆيك ۋنيۆەرسيتەتىنىڭ ۆيرۋسولوگى قازاقستاندا تارالىپ جاتقان "بەلگىسىز پنيەۆمونيانى" ەپيدەميولوگيالىق تۇرعىدان COVID-19 دەپ تۇجىرىمدايتىنىن جەتكىزگەن. 

قازاقستاندىق نەيروحيرۋرگ دارىگەر مىڭجىلقى بەردىقوجايەۆ تا "پنيەۆمونيادان قايتىس بولىپ جاتقان ادامداردىڭ 99 پايىزىنىڭ ولىمىنە كوروناۆيرۋس سەبەپ" دەپ ايتقان.