قازاقستان پرەزيدەنتى ق.توقايەۆتىڭ قاۋلىسىمەن قىزمەت بارىسىندا قايتىس بولعان ەكى دارىگەر مەملەكەتتىك ناگرادامەن ماراپاتتالدى. بۇل تۋرالى اقوردانىڭ رەسمي سايتى حابارلادى.
اقتوبە وبلىسى "وبلىستىق كلينيكالىق جۇقپالى اۋرۋلار اۋرۋحاناسى" مكك باس دارىگەرى قوزباعاروۆ قاليحان ەسبوسىنۇلىنا جانە اقمولا وبلىسىنىڭ دەنساۋلىق ساقتاۋ باسقارماسى جانىنداعى "كوكشەتاۋ قالالىق كوپبەيىندى اۋرۋحاناسى" مكك بولىمشە مەڭگەرۋشىسى يسايەۆ ولەگ نيكولايەۆيچكە قايتىس بولعاننان كەيىن "قازاقستاننىڭ ەڭبەك ەرى" اتاعى بەرىلىپ، ايرىقشا ەرەكشەلىك بەلگىسى – التىن جۇلدىز بەن "وتان" وردەنى تاپسىرىلدى.
قاۋلى ماتىنىندە ماراپات مارقۇمدارعا "قازاقستان رەسپۋبليكاسىنا سىڭىرگەن اسا ۇزدىك ەڭبەگى، قىزمەتتىك بورىشىن اتقارۋ ۇستىندە كورسەتكەن جانقيارلىعى ءۇشىن" بەرىلگەنى جازىلعان.
13 شىلدەدە قازاقستان دەنساۋلىق ساقتاۋ مينيسترلىگى كوروناۆيرۋستان قايتىس بولعان مەديسينا قىزمەتكەرلەرىنىڭ تولىق ءتىزىمىن جاريالاعان بولاتىن.
پىكىر قالدىرۋ