قازاقستان پرەزيدەنتىنىڭ شتاتتان تىس كەڭەسشىسى ولجاس قۇدايبەرگەنوۆ ەلدەگى بولىپ جاتقان جاعدايدى "سۇمدىق تراگەديا" دەپ اتادى. بۇل تۋرالى ول Facebook پاراقشاسىندا جازدى.

– مەنىڭ نەمەرە اعام كەشە قايتىس بولدى. ارتىندا ءتورت بالاسى قالدى. سونىمەن قاتار بىرەر كۇن بۇرىن ەكى دوسىمنىڭ اكەسى، ارىپتەسىمنىڭ اناسى ءقاۋىپتى ىندەتتەن كوز جۇمدى. ال بۇگىن سۇمدىق كۇن بولدى. مەنىڭ تانىستارىمنان جالپى 11 ادام قايتىس بولدى. ءبىر ساعات بۇرىن 11ء-شى ادامنىڭ كوز جۇمعانى تۋرالى حابار كەلدى. تاعى ءبىر جاقسى ادامنىڭ 39 جاستاعى جالعىز ۇلى ومىردەن ءوتتى. قازىرگى بولىپ جاتقان جاعدايلار – سۇمدىق تراگەديا. ەرتە مە، كەش پە ءبارىمىز ومىردەن وتەمىز. ەگەر دە بارلىق جاعدايدى جاساپ قايتىس بولسا، وندا ماسەلە باسقا. ال ادامدار دارى-دارمەك جەتىسپەۋشىلىگىنەن، تىنىس الدىرۋ اپپاراتىنىڭ جوقتىعىنان نەمەسە اۋرۋحاناعا جاتۋ ءۇشىن دارىگەر مەن توسەك-ورىن تاپشىلىعىنان ماسەلەنىڭ شەشىلگەنىن كۇتىپ جاتىپ كوز جۇمسا، بۇل – قاسىرەت. بۇل يتاليانىڭ سەنارييى ەمەس، بۇل ونداعان جىل بويى بيۋروكراتيا مەن جاۋاپسىزدىق جەمقورلىققا ۇلاسقان وسىنداي قايعىلى ستاتيستيكا كورسەتەتىن ءبىزدىڭ ءوز سەنارييىمىز، – دەپ جازدى جەلىدەگى پاراقشاسىندا.

ونىڭ ايتۋىنشا بولىپ جاتقان ءجايتتاردىڭ ەڭ وكىنىشتىسى دارى-دارمەككە سوڭعى اقشاسىن جۇمساپ جاتقان ادامدار.

– ەڭ وكىنىشتىسى دارى-دارمەككە سوڭعى اقشاسىن جۇمساپ جاتقاندار جانە سول ءدارىنى قارىزعا الاتىن ادامدار. وكىنىشكە وراي، ءبىزدىڭ ۇكىمەت تولەم جاساۋ ءۇشىن قۇقىقتىق نەگىزدەردى كورمەيدى. ال ادامدار مورالدىق نەگىزدەردى كورمەي، وسىنداي كوزقاراستاعى جۇمىسىن جالعاستىرادى. ۇكىمەتتەگى ادامدار وتستاۆكاعا كەتىپ، ورنىنا جاڭا ادامدار كەلسە دە بيلىكتە وزگەرىس بولمايدى. ول ءۇشىن جاڭا ادامدار مەن جاڭا ەرەجەلەر بولۋى كەرەك. سوندا عانا كوروناۆيرۋس ينفەكسياسىنىڭ كەلەسى تولقىنى مۇنشا قايعىلى بولمايدى، – دەدى پرەزيدەنتتىڭ شتاتتان تىس كەڭەسشىسى.