اسكەري ساراپشىلار اقش پەن جۇڭگو ءۇشىن ەڭ ءقاۋىپتى ءسات كەلگەنىن مالىمدەدى. ولاردىڭ ايتۋىنشا، وڭتۇستىك جۇڭگو تەڭىزىندە بەيجىڭ مەن ۆاشينگتون اسكەري مانيەۆرلەردى ءبىر ۋاقىتتا وتكىزىپ، قاقتىعىس قاتەرى كۇشەيىپ كەلەدى. ەكى جاقتان دا كەمەلەر بىر-بىرىنە ءقاۋىپتى تۇردە جاقىنداپ، سوعىسۋ مۇمكىندىگى ارتقان. بۇل تۋرالى Daily Express گازەتى حابارلادى.

شىلدە ايىنىڭ باسىندا بەيجىڭ سوعىس كەمەلەرىنە داۋلى پاراكەل ارالدارى ماڭىندا اسكەري-تەڭىز جاتتىعۋلار وتكىزۋدى بۇيىرعان. قىتايدىڭ بۇل ارەكەتى ۆەتنامنىڭ  نارازىلىعىن تۋدىرعان.

جاقىندا پاراكەل ارالدارىنىڭ ماڭىنا اقش سوعىس ۇشاقتارىن تاسىمالداۋشى كەمەلەرىن جىبەرگەن. وعان قوسا يادرولىق بومبالاۋشى ۇشاعىن دا جونەلتكەن.  

ايماقتا اقش جانە جاپون كەمەلەرى بىرگە ارەكەت ەتۋدە.

وسى اپتادا ۆەتنامدىق گەنەرال ۆو تيان-ترۋنگ جۇڭگو مەن اقش-تىڭ اسكەري جاتتىعۋلارى تۇراقسىزدىق پەن شيەلەنىستى، ءتىپتى، اسكەري قاقتىعىس تۋداراتىنىن ەسكەرتتى. 

RAND كورپوراسياسىنىڭ تالداۋشىسى ەندريۋ سكوبەلل دە ەسكەرتۋسىز وتكىزىلىپ جاتقان اسكەري جاتتىعۋلارعا قارسى پىكىر ءبىلدىردى.

– بۇل مەنى قاتتى الاڭداتادى، – دەگەن سكوبەلل ەكى ەلدىڭ مۇنداي ارەكەتتەرى وتە ءقاۋىپتى ەكەنىن جەتكىزگەن. 

سينگاپۋرداعى س. رادجاراتنام اتىنداعى حالىقارالىق زەرتتەۋلەر مەكتەبىنىڭ عىلىمي قىزمەتكەرى وللي پەككا سۋورسا دا وتە جاقىن جەردە اسكەري جاتتىعۋلار وتكىزۋگە الاڭداۋشىلىعىن جاسىرماعان.

سۋورسا كوپتەگەن سوعىس كەمەلەرى مەن اسكەري ۇشاقتاردىڭ بىر-بىرىنە سونشالىق جاقىن ورنالاسۋى سوعىس قاتەرىن كۇشەيتەتىنىن مالىمدەدى.

ال وتكەن اپتادا اقش قورعانىس شەنەۋنىكتەرى وڭتۇستىك جۇڭگو تەڭىزىندەگى اسكەري كۇشتەر جاتتىعۋدى جالعاستىرا بەرەتىنىن جاريالاعان.