دوعارىستاعى گەنەرال-مايور، قازاقستان قورعانىس ءمينيسترىنىڭ بۇرىنعى ورىنباسارى امىربەك توگىسوۆ قايتىس بولدى. بۇل تۋرالى اقىن جۇماش كەنەباي ءوزىنىڭ facebook پاراقشاسىندا حابارلادى.

"وپپوزيسيا گەنەرالى، قازاقستان قورعانىس ءمينيسترىنىڭ بۇرىنعى ورىنباسارى، ايگىلى "ءۇش ءجۇز" پارتياسى ليدەرلەرىنىڭ ءبىرى، اق گەنەرالدار قولىنان ايۋاندىقپەن ولتىرىلگەن ۇلت سەركەسى توگىستىڭ تىكەلەي ۇرپاعى، ارامىزداعى ءبىر جاس ايىرماشىلىعىنا قاراماي قۇرداسىم، زامانداسىم، اسىل ازامات امىربەك توگىسوۆتەن قاپىدا ايرىلىپ قالدىق!" دەلىنگەن اقىن جازباسىندا.

جۇماش كەنەبايدىڭ سوزىنشە، حال ۇستىندە جاتقان گەنەرالعا ءدارى تابىلماعان. ءدارى تابىلىپ، تاڭەرتەڭگىسىن جەتكىزگەلى وتىرعاندا امىربەك توگىسوۆتىڭ تۇندە ءجۇرىپ كەتكەنى تۋرالى سۋىت حابار جەتكەن.

امىربەك توگىسوۆ 1949 جىلى 30 مامىردا التاي ولكەسىندە تۋعان. اسكەري ءمانسابى ۆزۆود كومانديرى رەتىندە باستالىپ، قازاقستاننىڭ ىشكى اسكەرى كومانديرىنىڭ ورىنباسارى، قورعانىس ءمينيسترىنىڭ ورىنباسارى قىزمەتتەرىنە دەيىن كوتەرىلگەن.

زەينەتكە شىققاننان كەيىن "قازاقالتىن" مەكەمەسىندە قاۋىپسىزدىك قىزمەتى دەپارتامەنتىنىڭ ديرەكتورى، ارتىنان باسقارۋشى ديرەكتور بولعان.

سونداي-اق "ادىلەتتى قازاقستان ءۇشىن" ۇيىمىنىڭ الماتى وبلىستىق فيليالىنىڭ ءتوراعاسى، جالپىۇلتتىق سوسيال-دەموكراتيالىق پارتيا ءتوراعاسىنىڭ ورىنباسارى، پارلامەنت ءماجىلىسى دەپۋتاتتىعىنا ۇمىتكەر بولعان.

جاقىندارىنىڭ سوزىنشە، مارقۇم كوروناۆيرۋستان قايتىس بولعان.