بۇگىن، 14 شىلدە كۇنى قايتىس بولعان قازاقستان قورعانىس ۆيسە-مينيسترى گەنەرال-مايور باقىت قۇرمانبايەۆتىڭ ولىمىنە كوروناۆيرۋس سەبەپ بولعان. بۇل تۋرالى ۆەدومستۆونىڭ باسپا ءسوز قىزمەتى حابارلادى. 

باقىت قۇرمانبايەۆ قورعانىس ءمينيسترىنىڭ ورىنباسارى قىزمەتىنە 2019 جىلدىڭ ساۋىرىندە تاعايىندالعان.

ول 1970 جىلى 21 قىركۇيەكتە وسكەمەن قالاسىندا دۇنيەگە كەلگەن.

2005 جىلى رەسەي قۇرلىق اسكەرلەرىنىڭ اۋە شابۋىلىنا قارسى قورعانىس اسكەري اكادەمياسىندا ءبىلىم الدى. 2008 جىلى رەسەي فەدەراسياسى قك باس شتابىنىڭ اسكەري اكادەمياسىنىڭ جوعارى اكادەميالىق كۋرستارىنان ءوتتى.

ءار جىلدارى فيزيكا ءپانىنىڭ ءمۇعالىمى، قورعانىس مينيسترلىگىنىڭ شتاب باستىقتارى كوميتەتى دەپارتامەنتىنىڭ باسقارما باستىعى بولىپ جۇمىس ىستەدى.

ءىى دارەجەلى "ايبىن" وردەنىمەن ماراپاتتالعان. گەنەرال-مايور شەنى بولعان.

مارقۇمنىڭ ارتىندا ايەلى، ەكى بالاسى قالدى.

باقىت قۇرمانبايەۆ – قازاقستاندا كوروناۆيرۋستان قايتىس بولعان العاشقى شەنەۋنىك. ال ەلدە كوروناۆيرۋس سياقتى ءورشىپ تۇرعان پنيەۆمونيا اۋرۋىنان بىرنەشە شەنەۋنىك  كوز جۇمعان. ولاردىڭ اراسىندا الماتى وبلىسى اكىمىنىڭ ورىنباسارى سەرىكجان بەسكەمپىروۆ، اقتاۋ قالاسى اكىمىنىڭ ورىنباسارى گۇلجازيرا الداشيەۆا بار.