الماتى قالالىق پوليسيا دەپارتامەنتى الەۋمەتتىك جەلىلەردى باقىلاۋ كەزىندە پوليسيا قىزمەتكەرى بەينەسىندە ۇندەۋ ايتقان ءانشى تالعات كەنجەبولاتوۆتى (كەنتال) نە ءۇشىن ۇستاعانىن ءتۇسىندىردى. بۇل تۋرالى Polisia.kz حابارلادى.
– بارىڭە سالەم، دوستار! كىم كۇيزەلىسكە دۋشار بولسا، جۇرەگى اۋىرسا، جۇمىستا، وتباسىندا قيىندىقتار تۋىنداعان بولسا... بىرەۋدى نەسيە قيناۋى مۇمكىن. ۋايىمداماڭىز. ءبارىبىر ءبارىمىز ولەمىز، – دەپ ۆيدەوۇندەۋ جولدادى ءانشى.
قۇقىق قورعاۋشىلار ۆيدەو اۆتورى ءانشى تالعات كەنجەبولاتوۆ (كەنتال) ەكەنىن انىقتادى. قۇقىق قورعاۋشىلاردىڭ ايتۋىنشا، ۆيدەو حالىق اراسىندا رەزونانس تدىرعان. سەبەبى الەۋمەتتىك جەلى قولدانۋشىلارىنىڭ كوبى ونى شىنىمەن دە قۇقىق قورعاۋشى دەپ ويلاپ قالىپتى.
– الماتى پوليسياسى بۇل ۆيدەوداعى پوليسيا فورماسىنداعى ەر ادام ءىس جۇزىندە ىشكى ىستەر ورگاندارىنىڭ قىزمەتكەرى ەمەس ەكەنىن حابارلايدى. كەنجەبولاتوۆتىڭ ىس-ارەكەتىنە قاتىستى جۇرگىزىلگەن تەكسەرۋ ناتيجەلەرى بويىنشا قۇقىقتىق باعا بەرىلەدى. قازاقستاندا كوروناۆيرۋس ينفەكسياسىنىڭ تارالۋىنا جانە قايعىلى وقيعالارعا بايلانىستى قالىپتاسقان جاعداي اياسىندا ءازىل ءۇشىن بولسا دا مۇنداي ۇندەۋلەر جاساۋعا بولمايدى، اسىرەسە پوليسيا فورماسىن قولدانۋى ورىنسىز، – دەيدى پوليسەيلەر.
ءانشى كەنتال ءوزىنىڭ الەۋمەتتىك جەلىدەگى پاراقشاسىندا ماسەلەنىڭ ءمان-جايىن ءتۇسىندىردى.
– ۇيىمە ەكى پوليسيا قىزمەتكەرى مەن قارۋ اسىنعان ارنايى جاساقتىڭ ەكى وكىلى كەلدى. مەنى ۇستاۋ حاتتاماسى بولعان جوق. سوعان قاراماستان، پوليسيا بولىمشەسىنە بارۋ كەرەك دەدى. مەن قارسىلىق بىلدىرگەن جوقپىن. ءبىراق جول-جونەكەي ادۆوكاتىما حابار بەردىم، – دەيدى ول.
پىكىر قالدىرۋ