42500 تەڭگە الەۋمەتتىك تولەمگە 17 شىلدەدەن باستاپ ءوتىنىم بەرۋگە بولادى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ورتالىق كوممۋنيكاسيالار قىزمەتىندە وتكەن بريفينگتە ايتتى.

مەملەكەتتىك الەۋمەتتىك ساقتاندىرۋ قورىنان

– الەۋمەتتىك تولەم كارانتين كەزىندەگىدەي قاعيداتتار بويىنشا مەملەكەتتىك الەۋمەتتىك ساقتاندىرۋ قورىنان تولەنەدى. ءبىز تولەمدى تاعايىنداۋدىڭ ەرەجەلەرىن جاساپ، الداعى بەيسەنبىدە جاريالايمىز. 17 شىلدەدەن باستاپ 42500 تەڭگەگە ءوتىنىم بەرۋگە بولادى. ءوتىنىم قابىلدايتىن 42500.enbek.kz، e.gov پورتالى جانە تەلەگرام-بوت جۇما كۇنى ىسكە قوسىلادى. سونداي-اق Halyk bank پەن Kaspi بانك وزدەرىنىڭ پلاتفورماسىندا جاڭا پورتالداردى ىسكە قوسۋعا نيەت ءبىلدىرىپ وتىر. ونى پىسىقتايمىز. الداعى ۋاقىتتا قوسىمشا حابارلايمىز، – دەدى مينيستر.

مينيستر الەۋمەتتىك تولەم تابىسىنان ايىرىلعان جالدامالى قىزمەتكەرلەرگە، جەكە كاسىپكەرلەرگە، ءوزىن-وزى جۇمىسپەن قامتۋشىلارعا تاعايىندالاتىنىن ايتتى.

جالدامالى قىزمەتكەرلەر ءۇشىن ءوتىنىمدى جۇمىس بەرۋشى بەرەدى. قالعان ساناتتاعىلار ءوتىنىمدى وزدەرى وتكىزەدى. ۇكىمەت الەۋمەتتىك تولەمدى وتكەن ەكى ايدا 42500 تەڭگە العاندارعا اۆتوماتتى تۇردە تاعايىندامايدى. ءار ءوتىنىم جەكە قارالادى.

ءوزىن-وزى جۇمىسپەن قامتۋشىلارعا ءبىرىڭعاي جيىنتىق تولەم تولەۋ مىندەتتى ەمەس.

كەشە قازاقستان پرەزيدەنتى قاسىم-جومارت توقايەۆ ەپيدەميولوگيالىق احۋالعا بايلانىستى ەلدە كارانتين رەجيمى تاعى ەكى اپتاعا سوزىلاتىنىن ايتىپ، مۇقتاج ازاماتتارعا 42500 تەڭگە تولەنەتىنىن ايتقان.

♦ وقي وتىرىڭىز: "جىرتىق جاماۋعا كەلمەيدى". 42500 تەڭگە حالىقتىڭ كەرەگىنە جەتە مە؟