قازاقستاندىق نەيروحيرۋرگ دارىگەر مىڭجىلقى بەردىقوجايەۆ قازاقستاندا بەس ءجۇز مىڭ ادامنىڭ كوروناۆيرۋس جۇقتىرعانىن ايتتى. ول بۇل اقپاراتتى جۋرناليست نارتاي ارالبايمەن سۇحبات بارىسىندا مالىمدەدى.

قازاقستانداعى كوروناۆيرۋس جايىنداعى قاتە اقپاراتتارعا پسر تەستتەرى دالدىگىنىڭ وتە تومەندىگى سەبەپ بولعانىن جەتكىزگەن نەيروحيرۋرگ شىلدەنىڭ باسىندا عانا 415 پنيەۆمونيا انىقتالعانىن ايتتى.

– 25 ماۋسىمنان 5 شىلدەگە دەيىن 415 پنيەۆمونيا انىقتالعان. ونىڭ شامامەن 20 پايىزى، ودان دا تومەن پايىزىندا عانا ءبىز كوروناۆيرۋستىڭ ءپسر-ىن دالەلدەپ وتىرمىز. قالعان 80 پايىزى پسر دالەلدەنبەگەن، ءبىراق كومپيۋتەر جانە رەنتگەن بويىنشا ول جەردە كوروناۆيرۋسقا ءتان وزگەرىستەر بار. ول دەگەنىمىز ەگەر 100 پايىزدى الاتىن بولساق، ونىڭ ىشىندە تەك قانا 20 پايىزىندا كوروناۆيرۋستىق پنيەۆمونيا انىقتالىپ وتىر، – دەدى دارىگەر سۇحباتتا.

ءجۋرناليستىڭ "سوندا ءسىزدىڭ سوزىڭىزشە، ءقازىر 150 مىڭ پنيەۆمونيامەن انىقتالعان ادام بار؟" دەگەن سۇراعىنا نەيروحيرۋرگ ودان دا اسىپ كەتكەنىن ايتتى.

–  جارتى ميلليونعا جەتىپ قالعان شىعار. ول بىلاي عوي، كوروناۆيرۋستىڭ 80 پايىزى سيپتومسىز نەمەسە جەڭىل تۇردە وتەدى نەمەسە ورتاشا تۇردە وتەدى. قالعان 15-20 پايىزى اۋىر تۇردە وتەدى. قايتىس بولىپ جاتقان نەمەسە اۋرۋحاناعا ءتۇسىپ قالىپ جاتقاندار اۋىر نەمەسە ورتاشا تۇردەگى ناۋقاستار. ەندى قولىڭىزداعى تۇرعان سيفرلاردى جاي سونىڭ پروسەنتىنە كوبەيتە بەرەسىز عوي. پروپورسيامەن....ول شىندىق. ەشكىم كوروناۆيرۋستىڭ بار ەكەنىن مويىندامايدى، – دەدى مامان.

بەردىقوجايەۆ سۇحباتتا وتكەن جىلى 60 مىڭ، ال 2020 جىلى شىلدەنىڭ ءبىر اپتاسىندا عانا 60 مىڭ ادام پنيەۆمونياعا شالدىققانىن مالىمدەدى.

ءجۋرناليستىڭ "ونى مينيسترلىك نەگە مويىندامايدى" دەگەن سۇراعىنا "مينيسترلىك مويىنداعان شىعار، ءبىراق ولاردىڭ وزدەرىنىڭ ءبىر الگوريتمدەرى بار عوي" دەپ جاۋاپ بەردى.

دارىگەر كوروناۆيرۋستىڭ قازاقستاندىق شتامى پايدا بولعانىن، ونى تەستپەن انىقتاۋ مۇمكىن ەمەستىگىن دە جاريالادى. ونىڭ سەبەبى رەتىندە ۆيرۋس مۋتاسياعا ۇشىراعانىن نەمەسە تەستتىك جۇيە قاتە جۇمىس ىستەيتىنىن مالىمدەدى. سوندىقتان تەست وتكىزۋدى توقتاتۋ كەرەكتىگى دە ايتىلدى.