قازاقستان تاجىكستانعا گۋمانيتارلىق كومەك رەتىندە ءپورتاتيۆتى وكپەنى جاساندى جەلدەتۋ اپپاراتتارىن بەرمەك. بۇل تۋرالى بۇگىن ورتالىق كوممۋنيكاسيالار قىزمەتىندە وتكەن بريفينگ كەزىندە دەنساۋلىق ساقتاۋ ۆيسە-مينيسترى ليۋدميلا بيۋرابەكوۆا ايتتى.
ونىڭ سوزىنشە، ۇكىمەت تاجىكستانعا گۋمانيتارلىق كومەكتى جىل سوڭىنا قاراي جىبەرەدى.
– قازىرگى ۋاقىتتا بارلىق ەل بىر-بىرىنە كومەك كورسەتىپ جاتىر. ەلىمىزگە دە باسقا مەملەكەتتەر گۋمانيتارلىق كومەك بەرۋدە. راسىندا دا قازاقستان ۇكىمەتى تاجىكستانعا جىلدىڭ سوڭىنا قاراي ءپورتاتيۆتى وكپەنى جاساندى جەلدەتۋ اپپاراتى تۇرىندەگى گۋمانيتارلىق كومەك كورسەتۋ تۋرالى ماسەلەنى قاراستىرىپ جاتىر. بۇل ءپورتاتيۆتى اپپارات ەكەندىگىن اتاپ وتكىم كەلەدى. ول پاسيەنتتى جەدەل جاردەم كولىگىمەن تاسىمالداۋ ءۇشىن قولدانىلادى، – دەدى ۆيسە-مينيستر.
ليۋدميلا بيۋرابەكوۆا ءپورتاتيۆتى وكپەنى جاساندى جەلدەتۋ اپپاراتى اقمولا وبلىسىندا شىعارىلاتىنىن ايتتى.
– بۇگىندە اتالعان ءوندىرۋشى ءوزىنىڭ وندىرىستىك قۋاتىن ارتتىرىپ وتىر. كاسىپورىن تۇركيالىق كومپانيامەن بىرگە قازىرگى ۋاقىتتا بىزگە اسا قاجەتتى بولىپ وتىرعان ستاسيونارلىق وكپەنى جاساندى جەلدەۋ اپپاراتىن دا شىعارۋدى جوسپارلاپ وتىر. ءوندىرىس تاياۋ ارالىقتا جولعا قويىلادى جانە جىلدىڭ سوڭىنا دەيىن ەلىمىزدىڭ بارلىق اۋرۋحانالارىنا قاجەتتى ءپورتاتيۆتى جانە ستاسيونارلىق وكپەنى جاساندى جەلدەتۋ اپپاراتتارمەن قامتاماسىز ەتەدى، – دەدى ۆيسە-مينيستر.
پىكىر قالدىرۋ