قازاقستان دەنساۋلىق ساقتاۋ ۆيسە-مينيسترى ليۋدميلا بيۋرابەكوۆا ەلدە پنيەۆمونياعا شالدىققاندار نە سەبەپتى كوروناۆيرۋس ستاتيستيكاسىنا ەنبەگەنىن ءتۇسىندىردى. ول بۇل تۋرالى ورتالىق كوممۋنيكاسيالار قىزمەتىنىڭ بريفينگىندە ايتتى.
– ءبىز ءقازىر حالىقارالىق ۇيىمدارمەن، دۇنيەجۇزىلىك دەنساۋلىق ساقتاۋ ۇيىمىمەن كەلىسسوز جۇرگىزىپ جاتىرمىز. بۇگىنگى كۇنى ددسۇ ۇسىنىمىنا سايكەس، ستاتيستيكاعا ءپتر-دىڭ وڭ ناتيجەسى بار جاعدايلار عانا كىرىپ وتىر، – دەپ جاۋاپ بەردى ۆيسە-مينيستر ب ا ق وكىلدەرى قويعان ساۋالعا.
سونداي-اق ەلدىڭ دەنساۋلىق ساقتاۋ مينيسترلىگى وسى ماسەلە تۋرالى دۇنيەجۇزىلىك دەنساۋلىق ساقتاۋ ۇيىمىنا سۇرانىس جىبەرگەن.
ۆيسە-مينيستر كەلىسسوزدەر ارقىلى ەسەپكە الىنۋعا ءتيىس مالىمەتتەرگە قاتىستى ورتاق شەشىمگە كەلەتىنىن حابارلادى. ول ءار ەلدىڭ ستاتيستيكاسى مەن ەسەپكە الۋعا بايلانىستى ءوز جولى بارىن، قازاقستان دا بارلىق ەلمەن قاتار جۇرگىسى كەلەتىنىن ايتتى.
پىكىر قالدىرۋ