اسكەري ساراپشىلاردىڭ پىكىرىنشە، قىتايدىڭ ءبىر ساتتە 10 يادرولىق وقتۇمسىق ورنالاستىرا الاتىن بالليستيكالىق زىمىرانى بار. ولار امەريكاداعى كەز كەلگەن نىساناعا 30 مينۋتتا جەتەدى. بۇل تۋرالى قامشى ءتىلشىسى نيۋ-يورك تايمس باسىلىمىنا سىلتەمە جاساپ حابارلايدى.
باسىلىمىنىڭ جازۋىنشا، "Dongfeng-41 (DF-41)" زىمىرانى قىتايدىڭ ەڭ ءقاۋىپتى اسكەري تەحنيكاسىنىڭ ءبىرى. ول قىتايدىڭ جولمەن قوزعالاتىن ءموبيلدى قۇرلىقارالىق بالليستيكالىق زىمىرانى. زىمىران 2019 جىلدىڭ 1 قازانىندا قىتايدىڭ ۇلتتىق كۇنىندەگى اسكەري شەرۋدە رەسمي تۇردە جاريالانعان. ول 12 مىڭنان 15 مىڭ شاقىرىمعا دەيىنگى ارالىققا جەتە الادى.
جۇڭگو حالىق-ازاتتىق ارمياسى بىلتىر بەيجىڭنىڭ تيانانمەن الاڭىندا وتكەن شەرۋدە كەم دەگەندە 16 "Dongfeng-41" زىمىرانى مەن كولىگىن كورسەتكەن.
اسكەري شەرۋگە 15 مىڭ اسكەر، 580 دانا اسكەري تەحنيكا جانە 160-تان استام جويعىش ۇشاق قاتىسقان.
سونداي-اق دىبىستان جىلدام زىمىران، گيپەرسونيكالىق زىمىران جانە روبوتتى سۇڭگۋىر قايىق كورسەتىلگەن. ال ءىرى بالليستيكالىق زىمىران ورتالىقتا جۇرگەن.
"Dongfeng 41" تۋرالى ەگجەي-تەگجەيلى اقپارات رەسمي تۇردە جاريالانباعان. دەگەنمەن ۆاشينگتونداعى ستراتەگيالىق جانە حالىقارالىق زەرتتەۋلەر ورتالىعى زىمىراننىڭ اقش-قا 30 مينۋتتا جەتىپ، 10-عا جۋىق وقتۇمسىقپەن جەكەلەگەن نىسانالارعا تيە الاتىنىن مالىمدەگەن.
جۇڭگو حالىق-ازاتتىق ارمياسىنىڭ وتستاۆكاداعى پولكوۆنيگى يۋە گانگ "Financial Times" گازەتىنە بەرگەن سۇحباتىندا "ءبىز بۇل ۇلكەن كيللەردى امەريكا ءۇشىن قولدانعىمىز كەلەدى. ءبىزدىڭ سىزدەرمەن باسەكەلەسۋگە مۇمكىندىگىمىز بولماسا دا، امەريكانىڭ بىزگە قارسى ءبىرىنشى بولىپ سوققى جاساۋعا باتىلى جەتپەۋى ءۇشىن ءبىز ءقازىر بىرنەشە ەرەكشە جابدىقتى جاساپ جاتىرمىز" دەگەن.
ستوكگولم حالىقارالىق بەيبىتشىلىكتى زەرتتەۋ ينستيتۋتىنىڭ (SIPRI) مالىمەتى بويىنشا، قىتايدا 280، امەريكادا 6450. رەسەيدە 6850 يادرولىق وقتۇمسىق بار.
پىكىر قالدىرۋ