مەديسينا عىلىمدارىنىڭ ماگيسترى، دارىگەر ماقسات ءابدىقادىر ۇلى قىتايلىق Lian hua Qing wen ءدارىسى تۋرالى Facebook پاراقشاسىندا پىكىر ءبىلدىردى.

"الەۋمەتتىك جەلىلەردە ءدال وسى جانە وسىعان ۇقساس دارىلەردىڭ رەسەپتتەرى قاپتاپ ءجۇر. وسى جازبالارعا بايلانىستى، دارىگەر رەتىندە ءبىزدىڭ تاراپىمىزعا كوپتەگەن سۇراقتار كەلۋدە. سوندىقتان، مەن ماقسات ءابدىقادىر ۇلى جالپى مەديسينا سالاسىندا 30 جىلدان اسا، سونىڭ ىشىندە قحر مەديسينا سالاسىندا 17 جىلدان اسا جۇمىس ىستەگەن مەديسينا عىلىمدارىنىڭ ماگيسترى، دارىگەر رەتىندە پرەپاراتقا تۇسىندىرمە بەرىپ كەتۋدى ءجون سانادىم.

Lian hua Qing wen پرەپاراتى
مەن قىتايداعى ارىپتەس مامانداردان سۇراستىرىپ جانە ءدارى شىققان زاۆودتىڭ كورسەتكىشتەرىن تەكسەرىپ كوردىم. 2020 جىلعى 2 اقپاندا Lian hua Qing wen پرەپاراتى جۇڭگو حالىق رەسپۋبليكاسىنىڭ دەنساۋلىق ساقتاۋ مينيسترلىگى شەشىمى بويىنشا جاڭا كوروناۆيرۋستى دياگنوستيكالاۋ جانە ەمدەۋ باعدارلاماسىنا سىناق رەتىندە ەنگىزىلدى. 2020 جىلدىڭ 4 ساۋىرىنەن باستاپ قحر كلينيكالارىندا كوروناۆيرۋسپەن اۋىراتىن ناۋقاستارعا كلينيكالىق تاجىريبە رەتىندە عانا قولدانىلىپ جاتقان ءدارى. كلينيكالىق تاجىريبەدەن ءوتىپ، رەسمي كوروناۆيرۋستى ەمدەيدى دەگەن ستاتۋس الماعان. ياعني، سىناق رەتىندە عانا قولدانىستا جۇرگەن ءدارى.
پرەپارات مىنا اۋرۋلاردى ەمدەۋ كەزىندە قولدانىلادى:
- تۇماۋ؛
- سۋانفاي بەزگەگى:
جاعىمسىز اسەرلەرى:
1. بۇل ءدارىنى قابىلداۋمەن قاتار، باسقا دا دارى-دارمەكتەردى قابىلداۋ ۇسىنىلمايدى.
2. بالالار، جۇكتى جانە بالا ەمىزەتىن ايەلدەر، ەگدە جاستاعى ادامدار دارىگەر باقىلاۋىمەن قابىلداۋ كەرەك.
3. گيپەرتونيا جانە جۇرەك-قانتامىر، باۋىر، قانتتى ديابەت، بۇيرەك اۋرۋلارى سياقتى اۋىر، سوزىلمالى اۋرۋلارى بار ادامدار دا دارىگەردىڭ باقىلاۋىمەن قابىلداۋى كەرەك.
4. دەنە قىزۋى 38،5-دەن جوعارى ناۋقاستارعا قابىلداۋعا بولمايدى.