2020 جىلعى 9-13 شىلدە ارالىعىندا ق ر قم قارجى مونيتورينگى كوميتەتىنىڭ اتىراۋ وبلىسى بويىنشا ەكونوميكالىق تەرگەۋ دەپارتامەنتىنىڭ (ەتد) قىزمەتكەرلەرى دارىلىك پرەپاراتتار مەن جەكە قورعانۋ قۇرالدارىن زاڭسىز ساتۋدىڭ 3 فاكتىسىنىڭ جولىن كەستى. بۇل تۋرالى اتالعان دەپارتامەنتتىڭ باسپا ءسوز قىزمەتى حابارلايدى.
وبلىستىق پوليسيا دەپارتامەنتىنىڭ قىزمەتكەرلەرىمەن بىرلەسىپ، جەدەل-ىزدەستىرۋ ءىس-شارالارىن جۇرگىزۋ بارىسىندا ەتد قىزمەتكەرلەرى دارىلىك زاتتاردى جوعارى باعامەن جانە رۇقسات قۇجاتتارىنسىز (ليسەنزياسىز) ساتۋدىڭ 2 فاكتىسىن انىقتادى.
اتىراۋ قالاسىنىڭ ەكى تۇرعىنى دارى-دارمەكتەردى زاڭسىز ساتقان. ولاردان 400-دەن استام بۋما، 50 فلاكون جانە امپۋلا تاپشى پرەپاراتتار (پاراسەتامول، دەكسامەتازون، ليدوكاين، سەفترياكسون، ازيتروميسين، اسەتيلساليسيل قىشقىلى، مەترونيدازول) تاركىلەندى. تاركىلەنگەن دارى-دارمەكتەر اتىراۋ وبلىسى اكىمدىگىنىڭ دەنساۋلىق ساقتاۋ باسقارماسىنا تاپسىرىلدى.
سونداي-اق، ەتد قىزمەتكەرلەرى پوليسيا دەپارتامەنتىمەن بىرلەسىپ، تەكسەرىس بارىسىندا تاعى 137 500 مەديسينالىق ماسكانى تاركىلەدى.
ايىپتى تۇلعالاردىڭ ارەكەتتەرىندە ق ر اقبتك-نىڭ 424-بابى («زاڭسىز مەديسينالىق جانە (نەمەسە) فارماسيەۆتيكالىق قىزمەت») جانە 426-بابىندا («فارماسيەۆتيكالىق قىزمەتتىڭ جانە دارىلىك زاتتار مەن مەديسينالىق بۇيىمداردىڭ اينالىسى سالاسىنىڭ قاعيدالارىن بۇزۋ») كوزدەلگەن اكىمشىلىك قۇقىقبۇزۋشىلىق بەلگىلەرى بار. ءىس ماتەريالدارى اتالعان تۇلعالاردى اكىمشىلىك جاۋاپقا تارتۋ ءۇشىن وكىلەتتى ورگانعا جولداندى.
