ءماجىلىس دەپۋتاتتارى كوروناۆيرۋس ىندەتىنىڭ تارالۋىنا قارسى ءبىرقاتار ماسەلەلەردى باقىلاۋعا الدى.

قازىرگى ۋاقىتتا ءماجىلىس دەپۋتاتتارى وڭىرلەردە كوروناۆيرۋسپەن كۇرەس جونىندەگى كەشەندى جۇمىستارعا بەلسەنە ارالاسىپ ءجۇر.

ولار قوعامدىق باقىلاۋ توپتارىمەن بىرگە ءدارىحانالارعا بارىپ، دارى-دارمەكتەردىڭ، مەديسينالىق ماقساتتاعى بۇيىمدار مەن باعالارعا مونيتورينگ جۇرگىزۋدە. سونىمەن قاتار، ەرىكتىلەردىڭ جۇمىسىن ۇيىمداستىرۋعا جاردەمدەسىپ، مەديسينالىق مەكەمەلەرگە گۋمانيتارلىق كومەكتىڭ جەتكىزىلۋى مەن تاراتىلۋىن، حالىقتى قاجەتتى تاۋارلارمەن جانە ازىق-تۇلىكپەن قامتاماسىز ەتۋدى باقىلاۋعا الدى.

سونداي-اق، دارىگەرلەردىڭ جۇمىس جاعدايلارى مەن اۋرۋحاناداعى ەمدەلۋشىلەردىڭ جاعدايلارىنا ەرەكشە كوڭىل ءبولىنىپ جاتىر.

ءماجىلىس دەپۋتاتتارى زاۋرەش امانجولوۆا مەن سەرىك قۇسايىنوۆ الماتىداعى ورتالىق قالالىق كلينيكالىق اۋرۋحاناعا بارىپ، مەديسينا قىزمەتكەرلەرىمەن كەزدەستى. كەزدەسۋ بارىسىندا كوروناۆيرۋسپەن ەمدەلىپ جاتقان ەمدەلۋشىلەردى ارالاپ، اۋرۋحانانىڭ ءدارىحانا قويماسىمەن تانىستى.

مەديسينالىق مەكەمە ءبىر مەزگىلدە COVID-19 دياگنوزى قويىلعان 320 ناۋقاستى قابىلداي الادى.

كۇن سايىن اۋىسىمعا اۋرۋحانانىڭ 150 قىزمەتكەرى تۇسەدى. مەديسينالىق مەكەمە بارلىق تۋىنداعان ماسەلەلەردى جىلدام شەشۋگە تىرىسۋدا.

– ءبىز جاڭا مودۋلدىك اۋرۋحانانى ارنايى تەكسەرمەدىك. ويتكەنى، ول جاڭا اپپاراتتار مەن پرەپاراتتارمەن قامتاماسىز ەتىلگەن. ال بۇل مەكەمە 70ء-شى جىلدارى سالىنعان جانە باستاپقىدا وسىنداي ماقساتتارعا ارنالماعان. دەگەنمەن، ول قايتا جابدىقتالدى. سونىمەن قاتار، كوروناۆيرۋستى ەمدەۋگە ارنالعان دارى-دارمەكتەردىڭ ءبىر ايعا جەتەتىن قورى بار، – دەدى ءماجىلىس دەپۋتاتى زاۋرەش امانجولوۆا.

اۋرۋحانا باسشىلىعى ەمدەلۋشىلەردى قابىلداۋ مۇمكىندىگىن ارتتىرۋ ءۇشىن قوسىمشا شارالار قابىلدانىپ جاتقانىن ايتتى.

جالپى ايتقاندا، ءماجىلىس دەپۋتاتتارىنىڭ ايماقتارداعى جۇمىسىنىڭ باستى باعىتى ءدارىحانالاردا دارى-دارمەكتەر مەن مەديسينالىق ماقساتتاعى بۇيىمداردىڭ، سونداي-اق دارى-دارمەكتەردىڭ باعاسىنا مونيتورينگ جۇرگىزۋ.

سىبايلاس جەمقورلىققا قارسى ءىس-قيمىل اگەنتتىگى قىزمەتكەرلەرىمەن جانە بەلسەندىلەرمەن بىرگە ءماجىلىس دەپۋتاتى سنەجاننا يماشيەۆا نۇر-سۇلتان قالاسىندا، ال ماجىلىسمەندەر گلەب ششەگەلسكيي مەن قۇرالاي قاراكەن اقتوبە قالاسىنا باردى. ءماجىلىس دەپۋتاتتارى يرينا ارونوۆا مەن ايگۇل نۇركينا قوستاناي مەن پاۆلودارداعى مەديسينالىق مەكەمەلەرگە گۋمانيتارلىق كومەكتىڭ تارالۋىن باقىلاۋدا ۇستايتىن بولادى. ماجىلىسمەندەر، ەڭ الدىمەن، گۋمانيتارلىق تاۋارلاردىڭ، اسىرەسە، مەديسينالىق ۇيىمدارعا جەتكىزىلۋىنە باسا نازار اۋدارۋدا.

سونىمەن قاتار، ءماجىلىس دەپۋتاتتارى حالىقتى الەۋمەتتىك قولداۋعا ەرەكشە ءمان بەرۋدە. ءماجىلىس دەپۋتاتى ەرلان بارلىبايەۆ الماتى وبلىسىنداعى بايسەركە اۋىلىنا بارىپ، 12 الەۋمەتتىك جاعدايى تومەن وتباسىنا كومەك بەردى. اۋىل تۇرعىندارىمەن اڭگىمەلەسۋ بارىسىندا ول ەشكىمنىڭ قولداۋسىز قالمايتىنىن ايتىپ، حالىقتى سابىرلى بولۋعا شاقىردى.