قازاقستاندا كوروناۆيرۋس ينفەكسياسىن جۇقتىرعان مەديسينا قىزمەتكەرلەرىنە وتەماقى تولەۋ باستالدى. بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ مالىمدەدى.
– بۇل وتەماقى دەنساۋلىق ساقتاۋ مەن ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ بىرلەسكەن بۇيرىعىنا سايكەس تولەنەدى. تولەم وپەراتورى رەتىندە مەملەكەتتىك الەۋمەتتىك ساقتاندىرۋ قورى بەكىتىلگەن. وتەماقى تولەۋگە وتىنىشتەردى وڭىرلىك دەنساۋلىق ساقتاۋ باسقارمالارى كوميسسيانىڭ ءتيىستى شەشىمدەرى نەگىزىندە جىبەرەدى، – دەپ اتاپ ءوتتى مينيستر ورتالىق كوممۋنيكاسيالار قىزمەتىندە وتكەن بريفينگتە.
ءمينيستردىڭ ايتۋىنشا، بۇگىن ساعات 14:00-دەگى جاعداي بويىنشا، وتەماقى تولەۋگە التى وڭىردەن 123 ءوتىنىش كەلىپ تۇسكەن.
– ەرەجە بويىنشا ءۇش جۇمىس كۇنىندە مەملەكەتتىك الەۋمەتتىك ساقتاندىرۋ قورى بۇل ازاماتتارعا ەكى ملن تەڭگەدەن تولەۋى ءتيىس. قاراجات وتىنىمدە كورسەتىلگەن رەكۆيزيتتەرگە جىبەرىلەدى. 123 ءوتىنىم ىشىندە قىزمەت بابىمەن قايتىس بولعان مەديسينا قىزمەتكەرلەرى جوق. ولار بويىنشا ءالى ءوتىنىم بەرىلمەدى، – دەدى ب. نۇرىمبەتوۆ.
قازاقستان قىزمەت بارىسىندا كوروناۆيرۋس ينفەكسياسىن جۇقتىرعان مەديسينا قىزمەتكەرىنە – ەكى ميلليون تەڭگەدەن، قايتىس بولعان قىزمەتكەردىڭ وتباسىنا – ون ميلليون تەڭگە وتەماقى بەكىتىلگەن ەدى.
پىكىر قالدىرۋ