قىزىلوردا وبلىسىنىڭ اكىمى گۇلشارا ءابدىقالىقوۆا قالا ىشىندەگى جولدى جاپپاۋدى سۇراعان ايەلدىڭ ۆيدەوسىنا قاتىستى تۇسىنىكتەمە بەردى.

بۇعان دەيىن جاڭاقورعان اۋدانىنىڭ تۇرعىنى قىزىلوردا وبلىسىنىڭ اكىمى كەلەدى دەپ جولدى جاۋىپ تاستاعانىن ايتىپ، ۆيدەو جاريالاعان.

ءابدىقالىقوۆانىڭ ايتۋىنشا، ايماق باسشىسى دا، اۋدان اكىمى دە جولدى جابۋعا تاپسىرما بەرمەگەن.

– بۇگىن جاڭاقورعان، شيەلى اۋداندارىنداعى اۋرۋحانالاردى ارالاپ، دارى-دارمەكپەن، وتتەگىمەن قامتاماسىز ەتۋ ماسەلەلەرىن قاراپ جاتىرمىن. وسىنداي ءىسساپار كەزىندە جاڭاقورعان اۋدانى ينفەكسيالىق اۋرۋحاناسىنىڭ قاسىندا ساندۋعاش تۇرلىبەكوۆا دەگەن ايەل ماعان كەلىپ، جولدىڭ جابىلعانىن ايتتى، – دەدى وبلىس اكىمى.

سونىمەن قاتار ول وسى ءىستىڭ ءمان-جايىن انىقتاۋدى وبلىستىق پوليسيا دەپارتامەنتى باسشىسىنا تاپسىرعانىن جەتكىزدى.

– مەن جولدى جابۋ تۋرالى تاپسىرما بەرگەن جوقپىن، اۋدان اكىمى دە ەشقانداي تاپسىرما بەرمەدى. سول جەردەگى ىشكى ىستەر ءبولىمىنىڭ باسشىسى دا ونداي تاپسىرما بەرىلمەگەنىن ايتىپ وتىر. بۇل ۋچاسكەلىك پوليسيانىڭ شەشىمى بولسا، ونىڭ ىس-ارەكەتىنە قاتىستى وبلىستىق دەپارتامەنت باسشىسى سۇلتان بەكتورەگە تاپسىرما بەردىم، – دەدى ءابدىقالىقوۆا.

ەندى پوليسيا دەپارتامەنتى ۋچاسكەلىك پوليسيانىڭ ىس-ارەكەتى قانشالىقتى دۇرىس ەكەنىن، قانداي كەمشىلىك جىبەرگەنىن انىقتايدى.

بۇعان دەيىن جەلىدە تاراعان ۆيدەودا جاڭاقورعان كەنتىنىڭ تۇرعىنى ءابدىقالىقوۆانىڭ الدىنان شىعىپ، وبلىس اكىمى بولاسىز با دەپ ناقتىلاپ سۇرايدى. سودان كەيىن قوعامدىق كولىك جارتى جولدان تاستاپ كەتكەنىن، جولدىڭ جابىلعانىن ايتادى.

– ءسىز وسىندا كەلە جاتىرمىن دەپ جولدى جاپتىردىڭىز با؟ ءبىزدى جولدان ءتۇسىرىپ كەتتى. جولدى جاپتىراتىن حاننىڭ قىزىسىز با؟ نەگە كەلە جاتقاندا وسىلاي جاسايسىزدار؟ حالىقتى قورلايسىزدار، حالىقپەن بىرگە ەمەسسىزدەر، –دەگەن بولاتىن وبلىس تۇرعىنى.

ۆيدەودا وبلىس اكىمى جولدى جاپتىرماعانىن ايتقان.