الماتىداعى ورتالىق قالالىق كلينيكالىق اۋرۋحانا دارىگەرلەرى وكپەسى 100 پايىز زاقىمدانعان ناۋقاستاردى امان الىپ قالدى. بۇل تۋرالى Almaty.tv حابارلادى.

تەلەارنانىڭ حابارلاۋىنشا، اۋرۋحانانىڭ رەانيماسيا بولىمىنە كۇنىنە 5-6 ناۋقاس اۋىر جاعدايدا ءتۇسىپ جاتىر. ءقازىر اۋرۋحانانىڭ جانساقتاۋ بولىمىندە 16 ناۋقاس جاتىر. ولار وكپەنى جاساندى جەلدەتۋ اپپاراتىنا قوسىلىپ، ۆيرۋسقا قارسى دارى-دارمەكتەرمەن قامتاماسىز ەتىلگەن. سونداي-اق ناۋقاستارعا قاندى سۇيىلتۋعا ارنالعان پرەپاراتتار بەرىلىپ، انتيباكتەريالدى ەم كورسەتىلىپ جاتىر. 

اۋرۋحانانىڭ جانساقتاۋ بولىمىندە جۇمىس ىستەيتىن رەانيماتولوگ ايجان شەريزات قىزىنىڭ ايتۋىنشا، دارىگەرلەر وكپەسى 100 پايىز زاقىمدانعان 44 جاستاعى ەر ادامنىڭ ءومىرىن امان الىپ قالعان. ناۋقاستى ءبىر اپتانىڭ ىشىندە رەانيماسيادان پالاتاعا اۋىستىرعان.

– ول ناۋقاس بىردەن وكپەنىڭ جاساندى ۆەنتيلياسياسىنا اۋىستىرىلدى. ءتۇرلى ەم قابىلدادى. بۇل ءبىز ءۇشىن وتە اۋىر. ۇيگە بارماعالى 2 جارىم اي بولدى. مامىر ايىنىن بەرى وسى كوروناۆيرۋس اۋرۋىمەن كۇرەسۋدەمىز. ناۋقاستاردى ەمدەپ، ولاردى وسى قيىن جاعدايدان شىعارىپ، ۇيىنە شىعارۋ ءبىزدىڭ ماقساتىمىز، – دەدى ورتالىق قالالىق كلينيكالىق اۋرۋحانانىڭ جانساقتاۋ ءبولىمىنىڭ مەڭگەرۋشىسى ايجان ايتبايەۆا.