– بايانداما بەتىندە جاعداي باقىلاۋدا بولعانىمەن، ءىس جۇزىندە ولاي ەمەس. پرەزيدەنت اكىمشىلىگىنە ەلىمىزدىڭ بارلىق ءدارىحانالارىنداعى دارى-دارمەكتەردى تەكسەرۋ جونىندە تاپسىرما بەردىم. ناتيجەسى كوڭىل كونشىتەرلىك ەمەس. باتىس قازاقستان، اتىراۋ، جامبىل، قاراعاندى وبلىستارىندا، نۇر-سۇلتان مەن الماتىدا ءدارى تاپشىلىعى، ۇزىن-سونار كەزەك ءالى دە بار. اسا قات دارىلەردىڭ باعاسى قىمبات ەكەنى انىقتالدى. كولەڭكەلى بيزنەستىڭ كولەمى ارتىپ بارا جاتىر، – دەدى قاسىم-جومارت توقايەۆ.

قۇقىق قورعاۋ ورگاندارى كوتەرمە جانە بولشەك ساۋدامەن اينالىساتىن ءدارىحانالاردا رەيدتەر مەن تەكسەرۋلەر جۇرگىزگەن. تەكسەرۋ قورىتىندىسى بويىنشا زاڭسىز دارى-دارمەك ساۋداسىمەن اينالىسقان 270 ادام قىلمىستىق جانە اكىمشىلىك جاۋاپكەرشىلىككە تارتىلعان، ونىڭ 116-سى مەديسينا قىزمەتكەرى. مەملەكەت باسشىسى بۇل باعىتتاعى جۇمىستاردىڭ جالعاسا بەرەتىنىن، سونداي-اق كىنالىلەر زاڭعا سايكەس جازالاناتىنىن اتاپ ءوتتى.

پرەزيدەنت ۇكىمەتتىڭ كوروناۆيرۋس پەن وكپە قابىنۋىنىڭ ستاتيستيكاسىن بىرىزدەندىرۋ تۋرالى شەشىمى پاندەميانىڭ تارالۋ كولەمىن ناقتى كورۋگە مۇمكىندىك بەرەتىنىن ايتتى. سونىمەن قاتار ستاتيستيكا مەن ساراپتامالارداعى كەمشىلىكتەردىڭ، جوسپارلاۋداعى تيىمسىزدىكتىڭ كەسىرىنەن وڭىرلەر وزدەرىنە قاجەتتى دارى-دارمەكتىڭ كولەمىن ناقتىلاي الماي وتىرعانىن جەتكىزدى. بارلىق پروبلەما جۇمىستى دۇرىس جوسپارلاماۋدان باستالاتىنىن ايتقان قاسىم-جومارت توقايەۆ، مۇنى كاسىبي شەبەرلىكتىڭ تومەندىگى دەپ باعالادى.

ەلدە شەكتەۋ شارالارى قابىلدانعانىمەن حالىق ءالى دە وتباسىلىق مەرەكەلەر جاساۋدى جالعاستىرىپ جاتىر. اتاپ ايتقاندا، مۇنداي جاعداي تۇركىستان، جامبىل، الماتى وبلىستارى مەن شىمكەنت قالاسىندا بايقالادى. پرەزيدەنت وسى رەتتە اكىمدەر كارانتين رەجيمىن ساقتاۋعا باعىتتالعان ءتۇسىندىرۋ جۇمىستارىن ءالسىز جۇرگىزگەنىن ايتىپ، سىنعا الدى.

– اكىمدەر اسا كۇردەلى جاعدايدا جۇمىس ىستەي المايدى. وزەكتى پروبلەمالاردى شۇعىل شەشۋدى، ازاماتتارعا مەملەكەتتىك ساياساتتى دۇرىس ءتۇسىندىرۋدى بىلمەيدى، – دەپ مالىمدەدى پرەزيدەنت.

ونىڭ سوزىنشە، ۇكىمەت مۇشەلەرى دە، اكىمدەر دە توقمەيىلسۋدىڭ، ماسايراۋدىڭ قاقپانىنا تۇسكەن.