قالالارداعى احۋالدى تۇراقتاندىرامىز دەپ، اۋىل تۇرعىندارىن ۇمىتىپ كەتپەۋىمىز كەرەك. بۇل تۋرالى پرەزيدەنت كوروناۆيرۋس ىندەتىنىڭ تارالۋ احۋالى جونىندەگى ۆەدومستۆوارالىق كوميسسيانىڭ وتىرىسىندا ايتتى.
قاسىم-جومارت توقايەۆ بۇگىندە اۋىلداعى ازاماتتار ءۇشىن دياگنوستيكا جانە ەمدەۋ شارالارى قول جەتىمدى ەمەس ەكەنىن ايتا كەلە، ولارعا قاراپايىم دارى-دارمەكتىڭ جەتپەي جاتقانىنا توقتالدى.
– اۋىل-ايماقتاردا مەديسينا كادرلارىنىڭ تاپشىلىعى جانە قاجەتتى ينفراقۇرىلىمنىڭ جوقتىعى جىعىلعانعا جۇدىرىق بولىپ وتىر. ۇكىمەت 2300 امبەباپ ءموبيلدى بريگادانىڭ جاساقتالعانىن باياندادى. الايدا ولار، نەگىزىنەن، قالا تۇرعىندارىنا عانا قىزمەت كورسەتەدى. اۋىلدى نازاردان تىس قالدىرۋعا بولمايدى! ۇكىمەتكە وڭىرلەرمەن بىرلەسىپ، بارىنشا قىسقا مەرزىمدە اۋىلداردى دياگنوستيكا جانە ەمدەۋ ىسىمەن، سونداي-اق، قاجەتتى دارى-دارمەكپەن، مەديسينا قۇرىلعىلارىمەن قامتاماسىز ەتۋدى تاپسىرامىن، – دەدى پرەزيدەنت.
پىكىر قالدىرۋ