ولجاس قۇدايبەرگەنوۆ پرەزيدەنت قاسىم-جومارت توقايەۆتىڭ شتاتتان تىس كەڭەسشىسى قىزمەتىنەن بوساتىلدى. بۇل تۋرالى مەملەكەت باسشىسىنىڭ باسپا ءسوز حاتشىسى بەرىك ءۋالي Facebook پاراقشاسىندا جازدى.
"ولجاس قۇدايبەرگەنوۆ قازاقستان رەسپۋبليكاسى پرەزيدەنتىنىڭ ەكونوميكالىق ماسەلەلەر بويىنشا شتاتتان تىس كەڭەسشىسى قىزمەتىنەن بوساتىلدى. مەملەكەت باسشىسى قاسىم-جومارت توقايەۆ ولجاس ابدىمالىكۇلىنا ەكونوميكانى دامىتۋ جونىندەگى ۇسىنىستارى ءۇشىن العىس ايتتى" دەلىنگەن حابارلامادا.
ولجاس قۇدايبەرگەنوۆ و باستا وزىنە بۇل قىزمەتتى التى اي ىستەيتىنى ايتىلعانىن، روتاسيا ماۋسىم ايىندا بولادى دەپ كۇتكەنىن مالىمدەدى.
سونداي-اق ول ءوزىنىڭ شتاتتان تىس كەڭەسشى لاۋازىمى كەي مالىمدەمەلەرىن ساياسيلاندىرىپ جىبەرگەنىن جەتكىزدى. ونىڭ قىزمەتىنەن كەتۋىن سوڭعى مالىمدەمەسىمەن بايلانىستىرىپ جاتقاندار بار.
ول كوروناۆيرۋس راستالىپ، پنيەۆمونيا انىقتالعان ازاماتتارعا اۋرۋحاناعا جۇگىنبەي، ۇيىندە ەمدەلگەندەردى قوسسا، شامامەن 2 ملن قازاقستاندىق كوروناۆيرۋسپەن اۋىرىپ شىققان بولۋى مۇمكىن ەكەنىن ايتقان.
پىكىر قالدىرۋ