پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا ەلدە قابىلدانىپ جاتقان ەپيدەمياعا قارسى شارالار جانە مەملەكەت باسشىسى بەرگەن تاپسىرمالاردىڭ ورىندالۋ بارىسى قارالدى. بۇل تۋرالى پرەمەر-مينيستر سايتى حابارلادى. 

قازاقستاندا ەپيدەميولوگيالىق جاعدايدىڭ ءبىرشاما تۇراقتالۋ دەڭگەيىنە شىقتى. رەسپۋبليكا بويىنشا كوروناۆيرۋس جۇقتىرعانداردىڭ ءوسىمى 2،1% قۇرايدى، ەڭ تومەنگى ءوسىم تاۋلىگىنە شىمكەنتتە – 1%، قىزىلوردا وبلىسىندا – 0،9%، تۇركىستان وبلىسىندا – 0،8%، اقتوبە وبلىسىندا – 0،5% تىركەلىپ وتىر.

جالپى توسەك-ورىن قورى 30،4 مىڭنان 49،7 مىڭ توسەك-ورىنعا دەيىن ۇلعايتىلدى. پروۆيزورلىق توسەك-ورىننىڭ بوس بولماۋى 20%-عا (89%-دان 69%-عا دەيىن) جانە رەانيماسيالىق توسەك-ورىننىڭ بوس بولماۋى 6%-عا (73%-دان 67%-عا دەيىن) ازايدى. COVID-تەن ساۋىعىپ كەتكەندەردىڭ سانى 60%-عا ءوستى، جەدەل جاردەمدى شاقىرۋلار سانى 23%-عا تومەندەدى. 

امبۋلاتورلىق دەڭگەيدە ۇيدە مەديسينالىق كومەك كورسەتۋ ءۇشىن 2962 بمسك ءموبيلدى بريگاداسى قۇرىلدى. وسى ايدىڭ سوڭىنا دەيىن مۇنداي بريگادالار سانى 3500 دەيىن جەتكىزىلەدى. ەمحانالارداعى Call-ورتالىقتار سانى 16%-عا ارتتى. 

بۇگىنگى تاڭدا ينفەكسيالىق جانە پروۆيزورلىق ستاسيونارلاردا 1958 ءوجج اپپاراتى بار، قوسىمشا 4183 اپپارات ساتىپ الىنادى، 21 مىڭنان استام توسەك-ورىن وتتەگىگە، 6237 ورىن وتتەگى كونسەنتراتورلارىنىڭ ەسەبىنەن قوسىلادى. بۇگىندە پتر-تەستىلەۋدىڭ قۋاتى تاۋلىگىنە 32 مىڭ زەرتتەۋدى قۇرايدى. بيىلعى جىلدىڭ 1 تامىزىنا قاراي بۇل كورسەتكىش تاۋلىگىنە 35،6 مىڭعا دەيىن، اعىمداعى جىلدىڭ 1 قىركۇيەگىنە قاراي تاۋلىگىنە 64 مىڭعا دەيىن جەتكىزىلەدى.

امبۋلاتورلىق كومەك كورسەتۋ ءۇشىن اۋىلدا 1493 ءموبيلدى بريگادا قۇرىلىپ، جۇمىس ىستەيدى، بۇل قاجەتتىلىكتىڭ 94%-ىن جابادى. اۋىلدا 641 جەدەل مەديسينالىق جاردەم ماشيناسى تارتىلعان.

ۇكىمەت باسشىسى اكىمدىكتەرگە، دەنساۋلىق ساقتاۋ جانە يندۋستريا مينيسترلىكتەرىنە وڭىرلەردەگى اۋرۋحانالاردى قاجەتتىلىكتەرىنە ساي ءوجج اپپاراتتارىمەن ا.ج. تامىزدىڭ سوڭىنا دەيىن قامتاماسىز ەتۋدى تاپسىردى. 

دەنساۋلىق ساقتاۋ مينيسترلىگىنە اكىمدىكتەرمەن جانە اۋىل شارۋاشىلىعى مينيسترلىگىمەن بىرگە شىلدەنىڭ سوڭىنا دەيىن وڭىرلەردە ۆەتەرينارلىق زەرتحانالار بازاسىندا پتر-تەستىلەۋ جونىندەگى جۇمىستى ۇيىمداستىرۋ جانە كادرلارمەن جاساقتاۋدى قامتاماسىز ەتۋ، اكىمدىكتەرگە اناليزدەردى وڭىرلەردىڭ زەرتحانالارىنا جەتكىزۋدىڭ ءتيىمدى لوگيستيكاسىن پىسىقتاۋ تاپسىرىلدى.

يندۋستريا، دەنساۋلىق ساقتاۋ جانە قارجى مينيسترلىكتەرىنە شۇعىل تۇردە وڭىرلەردى كوشپەلى دياگنوستيكالىق كەشەندەرمەن، اۋداندىق اۋرۋحانالاردى وتاندىق ءوندىرىستىڭ سيفرلىق رەنتگەن اپپاراتتارىمەن جاراقتاندىرۋ ماسەلەسىن شۇعىل شەشۋ، دەنساۋلىق ساقتاۋ مينيسترلىگى مەن اكىمدىكتەرگە ەكى اپتا ىشىندە وتتەگى كونسەنتراتورلارى مەن مەديسينالىق گازداردىڭ تولىق كولەمىن وڭىرلەرگە جەتكىزۋدى قامتاماسىز ەتۋ جونىندە تاپسىرما بەرىلدى.

«سق فارماسيا»-عا اعىمداعى جىلدىڭ شىلدە ايىنىڭ سوڭىنا دەيىن دارى-دارمەك ساتىپ الىپ، ولاردى قوسىمشا ءبىر ايعا جەتەتىن كولەمدە وڭىرلەرگە ءبولۋ، سونداي-اق ولاردىڭ دارى-دارمەك قاجەتتىلىگىن جوسپارلاۋدىڭ ناقتى جۇيەسىن بەلگىلەۋ جۇكتەلدى.

پرەمەر-مينيستر سونىمەن قاتار الماتى، نۇر-سۇلتان قالالارى مەن اقتوبە وبلىسىنىڭ ۇلگىسى بويىنشا ءار وڭىردە تۇراقتاندىرۋ قورلارىندا دارىلىك زاتتار مەن مەديسينالىق بۇيىمداردىڭ قاجەتتى قورىن جاساۋ تۋرالى تاپسىرما بەردى.