اتىراۋ اۋەجايىنان اسپانعا كوتەرىلىپ، ارتىنان شۇباتىلعان قويۋ قارا ءتۇتىن قالدىرىپ بارا جاتقان ۇشاق كوپشىلىكتىڭ كوڭىلىن الاڭداتتى. بۇل تۋرالى ktk.kz حابارلادى.

بۇعان دەيىن دە ءتۇرلى-تۇستى سۇيىقتىق شاشىپ جۇرگەن ۇشاقتىڭ ۆيدەوسى الەۋمەتتىك جەلىدە تاراپ، تالاي الىپ-قاشپا اڭگىمەگە سەبەپ بولعان. اتىراۋ تۇرعىندارى بۇل جولى دا شوشىپ وتىر.

تۇرعىنداردىڭ ايتۋىنشا، مۇنداي ۇشاق اتىراۋدا راسىمەن جوق. ينجەنەرلىك-اۆياسيا قىزمەتى وكىلدەرى بۇل ۇشاقتار اتىراۋعا ترانزيتتىك باعىتتا ۇشىپ-قوناتىنىن ايتتى. كەڭەس وداعى كەزىندە 1960 جىلدارى شىعارىلعان «انتونوۆ-12» جۇك تاسىمالداۋشى اۋە كەمەسى كورشىلەس ەلدەردە ءالى قولدانىستا ءجۇر. ولار اتىراۋداعى ءىرى وندىرىستىك كاسىپورىندارعا مۇناي-گاز قوندىرعىلارىن تاسىمالدايدى.

اتالعان اۋە كەمەلەرى اتىراۋ اۋەجايىنا اپتاسىنا ەكى رەت كەلىپ كەتەدى ەكەن. ۇشاقتىڭ وزىندىك سالماعى 61 توننا، ال جۇك كوتەرۋ سالماعى 21 توننا. ماماندار «بۇل تۇرعىندار ءۇشىن اسا ءقاۋىپتى ەمەس» دەپ، شۇباتىلعان قارا جولاقتىڭ نە ەكەنىن ءتۇسىندىردى.   

– تۇرعىندار اراسىندا  ۇلكەن داۋ تۋعىزىپ جاتقان بەينەجازبالارعا قاتىستى ايتارىمىز بار. بۇل قالىپتى جاعداي. كەڭەستىك ءوندىرىستىڭ ۇشاقتارى وسىنداي اسەر بەرەدى. ويتكەنى ول كەزەڭدە ەشكىم ەكولوگيالىق قاۋىپسىزدىك تۋرالى باس قاتىرعان جوق.  ەسكى ۇشاقتاردىڭ بارلىعى قالىپتى بيىكتىككە كوتەرىلگەنشە، جانارمايدى وتە كوپ تۇتىنادى، كۇن اسا ىستىق كەزدە قوزعالتقىشقا اۋا جەتپەگەندىكتەن، سونداي ءتۇتىن پايدا بولادى، – دەدى اتىراۋ حالىقارالىق اۋەجايى، ينجەنەرلىك-اۆياسيالىق قىزمەتىنىڭ باسشىسى اندرەي كيم.