تۇركىستان وبلىسى بويىنشا اۋرۋحانادا جاتقان ناۋقاستار سانى ازايىپ كەلەدى.
تۇركىستان قالالىق ورتالىق اۋرۋحاناسىندا ەم قابىلداپ جاتقان ساراگۇل تىلەۋبەرگەنوۆانىڭ ايتۋىنشا، بارلىق دارى-دارمەك مولشەرى جەتكىلىكتى. 67 جاستاعى ساراگۇل حانىم قالالىق اۋرۋحاناعا اۋىر حالدە 12 كۇن بۇرىن جەتكىزىلگەن. جۇرەك تالماسى مەن قان اينالىمىنىڭ بۇزىلۋىنان جەدەل-جاردەمگە جۇگىنگەن. ارتىنان قاتتى جوتەل قىسىپ، تىنىس الۋى ناشارلاعان. اۋرۋحانادا جاتقان ۋاقىت ىشىندە اۋرۋىنان تولىعىمەن ايىقتى. ءوزى دە 40 جىل مەديسينا سالاسىندا قىزمەت اتقارعان ساراگۇل تىلەۋبەرگەنوۆا دارىگەرلەرگە ۇلكەن العىسىن ءبىلدىردى.
وماروۆا سايارا دا 10 كۇن بۇرىن باسپاسى اسقىنىپ اۋرۋحاناعا تۇسكەن. 35 جىل ءمۇعالىم بولىپ جۇمىس ىستەگەن 61 جاستاعى ناۋقاس بۇعان دەيىن اۋرۋحاناعا جاتىپ كورمەگەن. اق حالاتتى ابزال جانداردىڭ ارقاسىندا ءقازىر جاعدايى قالىپقا ءتۇسىپ، بۇگىن اۋرۋحانادان شىققالى جاتىر.
– دارىگەرلەر – قازىرگى زاماننىڭ ناعىز قاھارماندارى. ولاردىڭ ەڭبەگى ولشەۋسىز ءارى باعالى. بۇگىندە ادام جانىنىڭ اراشاسىنا اينالعان دارىگەرلەر ءوز بىلىكتىلىكتەرىن كورسەتۋدە، – دەيدى وماروۆا سايارا.
قازىرگى تاڭدا تۇركىستان وبلىسىندا كوروناۆيرۋس ينفەكسياسىن جۇقتىرعان ناۋقاستار سانى – 2513. دەرتتەن جازىلعان ناۋقاستار سانى – 1949.
پىكىر قالدىرۋ