الماتى قالاسىندا كوروناۆيرۋس ەپيدەمياسىنا قارسى كۇرەس شارالارىنا 9 ميلليارد تەڭگەگە جۋىق قارجى بولىنگەن. باستاپقى جوسپار بويىنشا ونىڭ 5،5 ميلليارد تەڭگەدەن استامى كوروناۆيرۋسقا قارسى كۇرەسىپ جاتقان دەنساۋلىق ساقتاۋ سالاسى قىزمەتكەرلەرىنە قوسىمشا ۇستەمەاقى رەتىندە تولەنۋگە ءتيىس بولاتىن.

– قازىرگى تاڭدا ۇستەمەاقىعا بولىنگەن سوما ءبىرشاما ارتىپ، 6،68 ملرد تەڭگەگە جەتتى. بۇعان اۋرۋحانالاردا اشىلعان قوسىمشا توسەك-ورىن سانى مەن كوروناۆيرۋسقا قارسى كۇرەسكە جۇمىلدىرىلعان قىزمەتكەرلەرگە تولەنەتىن سومانىڭ ارتۋى تۇرتكى بولىپ وتىر، – دەدى «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالىنىڭ ديرەكتورى تىلەۋحان ابىلدايەۆ.

حابارلاماعا سۇيەنسەك، ۆيرۋسقا قارسى كۇرەسكە قاتىسىپ جاتقان مەديسينا نىساندارىنىڭ ءتىزىمىن الماتى اكىمدىگىندەگى ارنايى كوميسسيا بەكىتكەن. بەكىتىلگەن تىزىمگە سايكەس، ناۋرىز-مامىر ايلارىندا  مەديسينا ماماندارىنا 4،3 ملرد تەڭگەگە جۋىق قاراجات تولەندى.  جالپى العاندا:

ءقاۋىپ دەڭگەيى اسا جوعارى 1-توپقا – 1،6 ملرد تەڭگە؛

ءقاۋىپ دەڭگەيى جوعارى 2-توپقا – 1،9 ملرد تەڭگەدەن استام؛

ءقاۋىپ دەڭگەيى ورتاشا 3-توپقا – 689 ملن.تەڭگەدەن استام ۇستەماقى بەرىلدى.

فيليال مالىمەتىنشە، ماۋسىم ايىندا وڭتۇستىك استانا بويىنشا 5441 مەديسينا مامانىنا 1،8 ملرد تەڭگەدەن استام ۇستەمەاقى الادى. ونىڭ ىشىندە:

ءقاۋىپ دەڭگەيى اسا جوعارى 1-توپقا – 871،1 ملن تەڭگە (بارلىعى 1407 ادام)؛

ءقاۋىپ دەڭگەيى جوعارى 2-توپقا – 710،2 ملن تەڭگەدەن (2498 ادام)؛

ءقاۋىپ دەڭگەيى ورتاشا 3-توپقا – 227،5 ملن تەڭگە (1536 ادام).

– قازىرگى تاڭدا 1 ملرد تەڭگە كولەمىندە قوسىمشا ۇستەماقى تولەندى. ونىڭ 608،8 ملن تەڭگەسى جەدەل جاردەم قىزمەتىنە تيەسىلى. سونىمەن قاتار، ينفەكسيالىق، پروۆيزورلىق جانە كارانتيندىك توسەك-ورىن ۇيىمداستىرىلعان ستاسيونارلار، ەمحانا قىزمەتكەرلەرىنە (فيلترلەر، 4-ساناتتاعى جەدەل جاردەم شاقىرتۋلارى، لابورانتتاردان قۇرالعان ءموبيلدى بريگادالار) 1،2 ملرد تەڭگە تولەندى. جالپى العاندا، 913 دارىگەر، 2677 ورتا بۋىن مەديسينا قىزمەتكەرى، 980 كىشى پەرسونال، وزگە دە 871 قىزمەتكەر (سونىڭ ىشىندە جەدەل جاردەم قىزمەتىنىڭ 803 جۇرگىزۋشىسى) ۇتەماقى الدى، – دەپ قوستى تىلەۋحان ابىلدايەۆ.

ايتۋىنشا، قازىرگى تاڭدا قالادا ەپيدەمياعا قارسى ءىس-شارالارعا 92 دەنساۋلىق ساقتاۋ نىسانى جۇمىلدىرىلعان، ونىڭ 74ء-ى – ەمحانا.

ەستەرىڭىزگە سالا كەتسەك، قوسىمشا تولەمدەر دەنساۋلىق ساقتاۋ سالاسى قىزمەتكەرىنىڭ ومىرىنە توندىرەتىن ءقاۋىپ دەڭگەيىنە قاراي تولەنەدى. 

• ءبىرىنشىسى – ءقاۋىپ دەڭگەيى اسا جوعارى توپ. وعان ينفەكسيالىق ستاسيونارلار مەن جانساقتاۋ بولىمدەرىنىڭ دارىگەرلەرى، اعا جانە ورتا بۋىن مەديسينا قىزمەتكەرلەرى جاتادى.
• ەكىنشىسى – ءقاۋىپ دەڭگەيى جوعارى توپ. وعان پروۆيزورلىق ستاسيونارلاردا جۇمىس ىستەيتىن ماماندار، جەدەل مەديسينالىق جاردەم، سانيتارلىق اۆياسيا قىزمەتىنىڭ دارىگەرلەرى مەن فەلدشەرلەرى كىرەدى.
• ءۇشىنشىسى – ءقاۋىپ دەڭگەيى ورتاشا توپ. وعان كارانتيندىك ستاسيونارلاردىڭ دارىگەرلەرى، ورتا جانە كىشى مەديسينا قىزمەتكەرلەرى، سانيتارلىق دارىگەرلەر (مەملەكەتتىك قىزمەتكەرلەر)، جەدەل جاردەم كولىگىنىڭ جۇرگىزۋشىلەرى ت.ب. جاتادى.