تۇركىستان وبلىسى كەنتاۋ قالاسىنا قاراستى شورناق اۋىلىندا بولعان جاپپاي توبەلەستەن كەيىن ءتورت ادام ۇستالىپ، ولاردىڭ ەكەۋى قاماۋعا الىندى. بۇل تۋرالى وبلىستىق پوليسيا دەپارتامەنتى حابارلادى.
كەشە تۇندە بولعان توبەلەستى الەۋمەتتىك جەلى قولدانۋشىلارى "ۇلتارالىق قاقتىعىس" دەپ سيپاتتاعان بولاتىن، الايدا پوليسيا دەپارتامەنتى تاراتقان حابارلامادا "شورناق اۋىلىندا تۇرمىستىق جانجال بولدى" دەپ ايتىلدى.
"تۇركىستان وبلىسى كەنتاۋ قالاسىنا قاراستى شورناق اۋىلىندا تۇرمىستىق جانجال بولدى. وسى وقيعاعا بايلانىستى جۇرگىزىلگەن ىزدەستىرۋ ءىس-شارالارى بارىسىندا كريمينالدىق پوليسيا قىزمەتكەرلەرى ءتورت ازاماتتى ۇستادى. ولاردىڭ ەكەۋى سوت شەشىمىمەن قاماۋعا الىندى. قازىرگى ۋاقىتتا بولعان وقيعانىڭ تولىق ءمان-جايى انىقتالىپ، بۇزاقىلىق فاكتىسى بويىنشا سوتقا دەيىنگى تەرگەۋ امالدارى جۇرگىزىلىپ جاتىر" دەلىنگەن پوليسيا دەپارتامەنتى تاراتقان حابارلامادا.
دەپارتامەنت تاراتقان حابارلاماعا قارعاندا وقيعا 21 شىلدە كۇنى اۋىل تۇرعىندارى اراسىندا بولعان جانجالدان كەيىن باستالعان. جانجال سوڭى 22 شىلدە كۇنى جاپپاي توبەلەسكە ۇلاسقان. سالدارىنا ءۇش ادام تاستان جاراقات العان. ولاردىڭ اراسىندا ۋچاسكەلىك پوليسيا ينسپەكتورى دا بار. پوليسيا دەپارتامەنتىنىڭ دەرەگىنشە، 23 شىلدە كۇنى شورناق اۋىلىندا "ارانداتۋشىلار جينالىپ، جاقىن ماڭداعى اۋىل تۇرعىندارىن زاڭعا قايشى ارەكەت جاساۋعا" شاقىرعان، ءبىراق پوليسيا قىزمەتكەرلەرى وعان جول بەرمەگەن.
