پرەزيدەنت ق.توقايەۆ تۇركىستان وبلىسى شورناق اۋىلى مەن قاراعاندى وبلىسى ساتبايەۆ قالاسىنداعى وقيعالارعا بايلانىستى كەڭەس وتكىزدى. وعان پرەزيدەنت اكىمشىلىگىنىڭ باسشىسى، تۇركىستان جانە قاراعاندى وبلىستارىنىڭ اكىمدەرى، قۇقىق قورعاۋ ورگاندارىنىڭ باسشىلارى قاتىستى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي حابارلادى.

"دەر كەزىندە قابىلدانعان شەشىمدەردىڭ ارقاسىندا شورناق اۋىلى مەن ساتبايەۆ قالاسىنداعى جاعداي تۇراقتالدى. تارتىپسىزدىكتىڭ قايتالانۋىنا ەشقانداي سەبەپ جوق. پرەزيدەنت جاعدايدى باقىلاۋدا ۇستاپ، جەرگىلىكتى تۇرعىندار اراسىندا ءتۇسىندىرۋ جۇمىستارىن جۇرگىزۋدى، ەل ىشىندەگى تۇراقتىلىقتى بۇزۋعا تالپىنعان ارانداتۋشىلاردىڭ الدىن الۋدى، قۇقىق بۇزۋشىلاردى زاڭ اياسىندا جاۋاپكەرشىلىككە تارتۋدى تاپسىردى. سونىمەن قاتار ول اتالعان ايماقتارداعى حالىقتىڭ ەڭ باستى الەۋمەتتىك-ەكونوميكالىق قاجەتتىلىكتەرىنە نازار اۋدارۋ كەرەك ەكەنىن ايتتى. ال قۇقىق قورعاۋ ورگاندارىنا كامەلەت جاسىنا تولماعان قىزدى زورلاماق بولدى دەگەن كۇدىكپەن ۇستالعان ساتبايەۆ قالاسىنىڭ تۇرعىنىنا قاتىستى تەرگەۋ جۇمىستارىن جان-جاقتى جۇرگىزىپ، ونىڭ قورىتىندىسى تۋرالى جۇرتشىلىققا ناقتى اقپارات بەرۋ تۋرالى تاپسىرما بەردى" دەلىنگەن بەرىك ءۋاليدىڭ facebook-تاعى جازباسىندا.

كەشە، تۇركىستان وبلىسى كەنتاۋ قالاسىنا قاراستى شورناق اۋىلىندا اۋىل تۇرعىندارىنىڭ اراسىندا توبەلەس بولعانى حابارلاندى. اتالعان جايت بويىنشا ءتورت ادام ۇستالىپ، ولاردىڭ ەكەۋى قاماۋعا الىندى.

الەۋمەتتىك جەلى قولدانۋشىلارى توبەلەستىڭ ۇلتارالىق سيپاتى بار ەكەنىن، جانجال قازاق-وزبەك اراسىندا بولعانىن ايتسا، جەلگىلىكتى پوليسيا دەپارتامەنتى تاراتقان حابارلامادا "شورناق اۋىلىندا تۇرمىستىق جانجال بولدى" دەلىنگەن.

ال 23 شىلدەدە كەشكى ساعات 9-دا ساتبايەۆ قالاسىنداعى ىشكى ىستەر باسقارماسىنا 5 جاسار قىزدىڭ جوعالعانى تۋرالى ارىز تۇسكەن.  جەدەل ىزدەستىرۋ ناتيجەسىندە ءبۇلدىرشىن قالاداعى ءبىر ۇيدەن تابىلدى. جاس قىزدى زورلادى دەگەن كۇدىكپەن ءبىر ادام قاماۋعا الىنعان.

ارتىنشا، ۇستالعان ازامات ءۇيىنىڭ جانىنا ءبىر توپ ادام جينالىپ، كۇدىكتىنى بەرۋدى تالاپ ەتكەن. اكىمدىك وسىعان بايلانىستى قۇقىق قورعاۋ ورگاندارىنىڭ قىزمەتكەرلەرى جۇمىلدىرىلعانىن حابارلادى.