بيىل «Nur Otan» پارتياسى پارتياىشىلىك پرايمەريز وتكىزەدى. ياعني، ەلوردامەن بىرگە ءاربىر وڭىردە پارتيانىڭ جاڭا كوشباسشىلارى ىرىكتەلىپ، ولار ءماجىلىس پەن ءماسليحاتتارداعى دەپۋتاتتىق كورپۋستى جاساقتاۋعا اتسالىسپاق.

پرايمەريز – اقش تاجىريبەسى دەپ ايتىلعانىمەن، قازاق قوعامى ءۇشىن بۇل جات ءداستۇر ەمەس دەيدى ساياساتتانۋشى قازبەك مايگەلدينوۆ. ياعني، قازاق حاندىعى تۇسىندا بي-شەشەندەر تۋرا وسىنداي جولمەن ىرىكتەلگەن.

– ءبىزدىڭ سالتىمىزدا بۇل ءداستۇر بار، ءبىز تەك ونى جاڭارتىپ، جانداندىرۋىمىز كەرەك. ەرتەرەكتە بيلەر بي بولۋ ءۇشىن ەل ارالاپ، حالىقتىڭ مۇڭىن تىڭداعان، داۋ-دامايدى سول جەردە شەشۋگە تىرىسقان. وسىلايشا مىقتىلارى ىرىكتەلىپ، بيلىككە كەلگەن. بىزگە دە ءقازىر سول قاجەت، – دەدى ساياساتتانۋشى «Nur Otan» پارتياسى جاقتاستارىنىڭ ليگاسى وتكىزگەن Zoom-كونفەرەنسيا بارىسىندا.

ونىڭ ايتۋىنشا، پرايمەريزدىڭ نەگىزگى شارتتارىنىڭ ءبىرى – دەبات. دەباتتا ءوز ويىن انىق جەتكىزىپ، كورسەتىلگەن پروبلەمانى شەشۋدىڭ ەڭ ءتيىمدى جولىن ۇسىنعان ۇمىتكەر عانا پارتيا اتىنان دەپۋتات بولۋىعا لايىقتى.

– بۇرىن تەلەارنالار جاستار اراسىندا دەبات ۇيىمداستىرىپ، تالاي كوشباسشىنى تاربيەلەپ شىعاردى. ءقازىر وكىنىشكە قاراي، بۇل ءۇردىس ءۇزىلىپ قالدى. پرايمەريز ونى جانداندىرادى دەپ ۇمىتتەنەمىن، ساياسي ناۋقان بىتكەننەن كەيىن دە رەسپۋبليكالىق تەلەارنالار مىقتى جاستاردى ىرىكتەپ، تاربيەلەۋمەن اينالىسۋى كەرەك، – دەدى مايگەلدينوۆ ونلاين-كونفەرەنسيادا.

Zoom-كونفەرەنسياعا «Nur Otan» پارتياسىنىڭ حاتشىسى ارمان قىرىقبايەۆ، ساياساتتانۋشىلار ايدوس سارىم مەن قازبەك مايگەلدينوۆ، جۋرناليستەر باعدات قوجاحمەتوۆ، ايدوس جۇقان ۇلى، راحات جاقسىباي، بلوگەرلەر ياكوۆ فەدوروۆ، بيبىگۇل داۋلەتبەك قىزى، سامات نۇرتازا قاتىستى.

كونفەرەنسيا بارىسىندا قازبەك مايگەلدينوۆ ۇكىمەت تاراپىنان جۇمىسسىزدىقتى جويۋدىڭ تەتىكتەرى ۇسىنىلماي وتىرعانىنا الاڭدايتىنىن ءبىلدىردى.

كوكتەمدە بولعان ەكى ايلىق كارانتين مەن قازىرگى شەكتەۋ شارالارى شاعىن جانە ورتا بيزنەس وكىلدەرىنە اۋىر سوققى بولدى دەپ ەسەپتەيدى ساراپشى.

– قانشا ايتقانمەن، ەكى اپتالىق كارانتين، وعان دەيىنگى توتەنشە جاعداي جەكە كاسىپكەلەردى بىلاي قويعاندا، كەيبىر مەمقىزمەتشىلەردى، ءوزىن-وزى جۇمىسپەن قامتىپ جۇرگەن ازاماتتاردى كۇندەلىكتى تابىسىنان ايىرىدى. 42500 تەڭگە الەۋمەتتىك كومەك بەرىلگەنىمەن، جۇمىسسىزدىقتى جوياتىن ناقتى تەتىكتەر ايتىلماي وتىر. بۇل رەتتە بىزگە كورشىلەس وزبەكستاننىڭ تاجىريبەسىن الۋعا بولادى. ياعني، ءاربىر وبلىس، ءاربىر اۋدان، ءاربىر تۇرعىلىقتى جەردىڭ كليماتى مەن مادەنيەتىنە بايلانىستى قولونەر مەن اۋىل شارۋاشىلىعىن دامىتۋعا بولادى. مۇنى مەملەكەت باسشىسى قاسىم-جومارت توقايەۆ تا ايتقان. ياعني، كىشى زاتتار ەكونوميكاسىن قالىپتاستىرۋ كەرەك. وسى ايماقتاردىڭ وزىنە ءتان شارۋاشىلىقتار بويىنشا كىشىگىرىم سەحتار اشىپ، قازاقستاننىڭ جالپى ىشكى ءوندىرىسىن، ءونىمىن دامىتۋ كەرەك، – دەيدى قازبەك مايگەلدينوۆ.