ق ر پرەزيدەنتىنىڭ كەڭەسشىسى ەرلان قارين ەلدە بالالارعا زورلىق-زومبىلىق جاساعاندارعا قاراستىرىلعان قاتاڭ جازانىڭ بار ەكەنىن ايتتى. بۇل تۋرالى ول تەلەگرام پاراقشاسىندا جازدى.
"سوڭعى وقيعالارعا بايلانىستى جەلى پايدالانۋشىلارى بالالارعا جاسالعان زورلىق-زومبىلىققا جازانى كۇشەيتۋ كەرەك دەپ جازىپ ءجۇر. شىن مانىندە مۇنداي شارالار مەملەكەت باسشىسىنىڭ باستاماسىمەن وتكەن جىلى قابىلدانعان ەدى. پرەزيدەنت 2019 جىلدىڭ 2 قىركۇيەگىندە قازاقستان حالقىنا ارنالعان العاشقى جولداۋىندا سەكسۋالدىق زورلىق-زومبىلىق، پەدوفيليا، ەسىرتكى تاراتۋ، ادام ساۋداسى، ايەلدەرگە قارسى تۇرمىستىق زورلىق-زومبىلىق جانە جەكە ادامعا، اسىرەسە بالالارعا قارسى باسقا دا اۋىر قىلمىستار جازاسىن جەدەل تۇردە قاتاڭداتۋدى تاپسىردى" دەپ جازدى ەرلان قارين.
پرەزيدەنت كەڭەسشىسى ءتيىستى زاڭ جوباسىنىڭ كۇزدە پارلامەنتكە تۇسكەنىن اتاپ ءوتتى.
"ال 30 جەلتوقساندا پرەزيدەنت "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق، قىلمىستىق-پروسەستىك زاڭنامانى جەتىلدىرۋ جانە جەكە ادام قۇقىقتارىنىڭ قورعالۋىن كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى جانە ول 2020 جىلدىڭ 1 قاڭتارىندا كۇشىنە ەندى. زاڭنىڭ جاڭا نورمالارىنا سايكەس، ورتاشا اۋىرلىقتاعى زورلىق-زومبىلىق قىلمىسى اۋىر قىلمىس ساناتىنا اۋىستىرىلدى. 14 جاسقا تولماعان بالالارعا زورلىق-زومبىلىق ءۇشىن 20 جىلعا دەيىن باس بوستاندىعىنان ايىرۋ نەمەسە ءومىر بويى قاماۋ جازاسى كوزدەلەدى. ودان بولەك، پەدوفيليا فاكتىلەرىن جەتكىزبەۋ، جاسىرۋ، بۇرمالاۋ ءۇشىن دە جاۋاپكەرشىلىك بەلگىلەنگەن. بۇل ەندى 6 جىلعا دەيىن باس بوستاندىعىنان ايىرۋى مۇمكىن اۋىر قىلمىس بولادى. بالالارعا قاتىستى زورلىق-زومبىلىقپەن كۇرەس ماسەلەسى – ءبىزدىڭ مەملەكەت ءۇشىن باسىم باعىتتاردىڭ ءبىرى" دەدى ەرلان قارين.
پىكىر قالدىرۋ