الماتى قالاسىنىڭ اكىمى باقىتجان ساعىنتايەۆ Halyk Arena-داعى كوروناۆيرۋستىق ينفەكسياسى بار ناۋقاستاردى ەمدەيتىن اۋرۋحانا رەتىندە جۇمىس ىستەۋگە دايىندىق بارىسىمەن تانىستى.

قالا اكىمى ءوزىنىڭ Instagram-داعى پاراقشاسىندا قالاداعى ينفەكسيالىق جانە پروۆيزورلىق اۋرۋحانالارعا قوسىمشا ورىندار ۇيىمداستىرۋ تۋرالى جازدى.

«قالاداعى جۇقپالى جانە پروۆيزورلىق ستاسيونارلار ءۇشىن قوسىمشا اشىلۋعا ءتيىس ورىنداردىڭ ۇيىمداستىرۋ بارىسىمەن تانىستىم. Halyk Arena-دا 1 مىڭ ورىنعا ارنالعان، سونىڭ ىشىندە رەانيماسيالىق 60 ورىن اشىلادى. دايىندىق بارىسىندا سانيتارلىق قاۋىپسىزدىكتىڭ ەڭ قاتاڭ تالاپتارى ەسكەرىلۋدە. تازا جانە لاس ايماقتارعا ارنالعان شليۋزدەر مەن تۋننەلدەر، جەلدەتۋ جانە زارارسىزداندىرۋ جۇيەلەرى ورناتىلدى. كەزەڭ-كەزەڭىمەن مەديسينالىق جابدىقتار ورناتىلادى. دارىگەرلىك بريگادالار دايىندالۋدا. جاقىندا ارادا بۇل جەر العاشقى پاسيەنتتەردى قابىلدايدى»، — دەپ حابارلادى ب. ساعىنتايەۆ.

جاقىندا جاربوسىنوۆ اتىنداعى ۋرولوگيا ۇو-ى بازاسىندا 150 ورىنعا ارنالعان ينفەكسيالىق ستاسيونار اشىلاتىن بولادى. بۇگىندە قوعامدىق دەنساۋلىق باسقارماسى ورنالاسقان وقك كورپۋسىندا قوسىمشا ورىندار اشىلادى. سونداي-اق جۇقپالى اۋرۋلار اۋرۋحاناسىندا دا قوسىمشا ورىندار اشىلۋ كوزدەلگەن. سونداي-اق №4 پەرزەنتحانانىڭ جاڭا عيماراتىن پايدالانۋعا بەرۋ تەزدەتىلەدى. پسيحونيەۆرولوگيالىق ورتالىقتىڭ قۇرىلىسى اياقتالۋعا جاقىن. ءبىر ايدان كەيىن بۇل جەر جۇقپالى اۋرۋلار ستاسيونارىنا اينالادى. وسى ارالىقتا باسقا دا نىساندار، سونىڭ ىشىندە قوناق ۇيلەر، ساناتورييلەر مەن جاتاقحانالار دايىن بولادى.

«قابىلدانعان شارالاردىڭ ارقاسىندا مەملەكەت باسشىسىنىڭ تاپسىرماسىنا سايكەس قاجەتتى ورىندار رەزەرۆى قۇرىلاتىن بولادى»، — دەپ الماتى قالاسىنىڭ اكىمى ب. ساعىنتايەۆ بۇگىندە الماتىدا ءقاۋىپتى ىندەتتى جۇقتىرعان ناۋقاستاردى ەمدەۋ ءۇشىن 4669 ورىنعا ارنالعان 21 مەديسينالىق ۇيىم جۇمىس ىستەيتىنىن تىلگە تيەك ەتتى.