الماتى اكىمى باقىتجان ساعىنتايەۆ جاستاردى كارانتين رەجيمىن ساقتاۋعا شاقىردى. بۇل تۋرالى قالا اكىمى Facebook-تەگى پاراقشاسىندا جازدى.

اكىمنىڭ ايتۋىنشا، ءقازىر قالادا ەكى اپتالىق كارانتين جالعاسۋدا. «جالپى الماتى ەپيدەمياعا قارسى تۇرا الۋدا. مەديسينالىق قىزمەتتىڭ جۇمىسى قاۋىرت. دەسە دە، بوساڭسۋعا بولمايدى. ينفەكسيانى ەڭسەرىپ، قالانىڭ قالىپتى تىرشىلىگىن قالپىنا كەلتىرۋ ءۇشىن كوپ نارسە ىستەۋ كەرەك.

قالا تۇرعىندارى سانيتارلىق نورمالاردى ساقتاپ، ىندەتپەن كۇرەسۋگە شىنداپ كىرىسكەنى قۋانتادى. الەۋمەتتانۋشىلاردىڭ مالىمەتى بويىنشا كوپتەگەن الماتىلىقتار كۆي-دان ساقتانۋدىڭ نەعۇرلىم «جەڭىل» ءتۇرىن قولدانۋدا ەكەن. ياعني، ساۋالناماعا قاتىسقان ءاربىر ادام «ۇنەمى قولىن جۋادى نەمەسە انتيسەپتيكتەردى پايدالانادى ەكەن» (95،9%). از، دەسە دە كوپشىلىگى قوعامدىق ورىنداردا ماسكا كيەدى (82،8%)»،- دەپ جازدى قالا اكىمى Facebook-تەگى پاراقشاسىندا.

«بۇل رەتتە مەنى، قالانىڭ اكىمى رەتىندە جاستاردىڭ بەيقامدىعى الاڭداتادى. 25-تەن 40 جاسقا دەيىنگى ءاربىر بەسىنشى جاس قالا تۇرعىنى نەمەسە رەسپوندەنتتەردىڭ 25%-ى جۇقتىرۋ ءقاۋپىن سەزىنبەيدى نەمەسە مويىندامايدى.

سوندىقتان جاستارعا جانە ورتا جاستاعى قالا تۇرعىندارىنا ايتارىم، جينالىڭدار! سانيتارلىق ەرەجە بارلىعىنا مىندەتتى. بۇل بەيقامدىق ءبىزدى ورعا جىعادى. جاقىندارىڭىز بەن قالانىڭ قاۋىپسىزدىگىنە ءقاۋىپ توندىرمەڭىزدەر.

مەملەكەت باسشىسى ق. ك. توقايەۆتىڭ ايتۋىنشا، ىندەت — سوعىستىڭ ءبىر ءتۇرى. بۇل ءقاۋىپتى ىندەت بەيقامدىقتى كەشىرمەيدى. ءبىز بىرلەسسەك قانا بۇل دەرتتى جەڭە الامىز. ءبىزدىڭ باستى قارۋىمىز — تەمىردەي ءتارتىپ. ىندەتكە قارسى كۇرەستە ىنتىماعىمىز ۇزىلمەسىن»، دەپ تۇيىندەدى باقىتجان ساعىنتايەۆ.